Trump është president, bursat po bien, Bitcoin po humb vlerë – çfarë po ndodh në SHBA?

Investitorët hynë të lumtur në vitin e ri shkaku i administratës Trump, e cila është miqësore ndaj biznesit dhe kriptomonedhave. Megjithatë, dy muaj pas fillimit të vitit 2025, aksionet amerikane kanë mbetur pas atyre të Evropës dhe Kinës, Bitcoin po bie dhe shqetësimet për inflacionin po rriten.

Aksionet amerikane ranë kryesisht të martën pasi investitorët analizuan një parashikim të dobët nga një anketë mbi besimin e konsumatorëve, e cila tregoi shqetësime të shtuara për inflacionin. Indeksi i besimit të konsumatorëve i Konferencës së Bordit regjistroi rënien më të madhe mujore që nga gushti i vitit 2021.

Dow Jones u luhat të martën, por mbylli në 43,621, ose 0.37 për qind më lart, pas rritjes gjatë tregtimit të pasdites. Indeksi i referencës S&P 500 u mbyll më ulët me rreth 0.47 për qind, ndërsa NASDAQ-i, që ka një përqendrim të lartë të aksioneve teknologjike, ra me 1.35 për qind, transmeton Telegrafi.

S&P 500 dhe NASDAQ mbyllën më ulët për sesionin e katërt me radhë. Të tre indekset kryesore të aksioneve amerikane janë në territorin negativ që nga momenti që presidenti amerikan, Donald Trump mori detyrën më 20 janar; NASDAQ ka rënë me më shumë se 1 për qind që nga fillimi i vitit 2025.

Aksionet amerikane patën një rritje pas rizgjedhjes së Trump në nëntor dhe S&P 500 mbylli në një rekord të lartë vetëm javën e kaluar. Megjithatë, tregjet amerikane janë shqetësuar ndërkohë që shenjat e inflacionit të qëndrueshëm janë në rritje dhe pasiguria rreth politikës tregtare dhe të tarifave të Trump vazhdon. Sentimenti i investitorëve të martën kaloi në një territor ekstrem frike për herë të parë që nga dhjetori, sipas Indeksit të Frikës dhe Lakmisë të CNN.

Ndërsa investitorët përgatiten për pasiguri, ata duket se po largohet nga aksionet dhe po kalojnë në asete më të sigurta si obligacionet qeveritare dhe po hedhin asetet e rrezikshme si kriptomonedhat: Bitcoin, i cili u ngjit deri në 106,000 dollarë rreth inaugurimit të Trump, ka rënë rreth 16 për qind gjatë muajit të fundit, duke tregtuar rreth 88 mijë dollarë të martën.

Të ardhurat nga obligacionet e 10-vjeçare amerikane ranë në 4.29 për qind të martën, ndërsa investitorët shkuan në obligacione, duke sinjalizuar shqetësime për pasigurinë dhe rritjen më të dobët të ekonomisë se sa pritej.

Walmart, një indikator i ekonomisë amerikane, shqetësoi investitorët javën e kaluar pasi sinjalizoi shitje më të ngadalta në vitin 2025 se sa pritej më parë.

Lexo po ashtu Hakimi më i madh në histori - vidhen 1.5 miliard euro kripto

VIX, indeksi i frikës së Wall Street, u rrit të martën në nivelin më të lartë të këtij viti para se të tërhiqej.

Ndërkohë që aksionet amerikane mund të jenë të shtrira, tregjet globale po shkëlqejnë. Indeksi STOXX 600 i Evropës është rritur gati 10% këtë vit. Në Kinë, aksionet vazhdojnë të performojnë më mirë se ato amerikane.

“Lëshimi i LLM nga DeepSeek ka ringjallur interesin për teknologjinë kineze (e cila tani është rritur mbi 35 për qind nga niveli i saj i ulët në janar), ndërsa zhvillimet rreth Ukrainës po shkaktojnë një rritje të performancës për kompanitë teknologjike evropiane dhe ato të ekspozuara ndaj mundësive të rindërtimit”, thanë analistët në Goldman Sachs në një shënim më 25 shkurt.

Testimi i tregut të rritjes

Dow dhe S&P 500 kanë fituar që pas rizgjedhjes së Trump në muajin nëntor dhe ende janë pak në të gjelbër që nga fillimi i vitit 2025.

Megjithatë, S&P 500 ka shënuar fitime pasuese më shumë se 20 për qind në vitet 2023 dhe 2024, duke ngritur pyetje nëse rritja e tregut mund të vazhdojë edhe në vitin 2025.

Aksionet e teknologjisë, të cilat e shtynë lart tregun e SHBA-së në vitin 2024, kanë pasur luhatje ditët e fundit. Nvidia (NVDA), Palantir (PLTR) dhe Tesla (TSLA) ishin liderët e shitjes së aksioneve të martën. Palantir, një yll i vitit 2024, ka rënë rreth 30 për qind në pesë ditët e fundit.

Lexo po ashtu Bien 'drastikisht' vlerat e kriptovalutave - pse po ndodh kjo?

Aksionet e Tesla ranë me 8.4 për qind të martën, duke e sjellë vlerën e tregut të kompanisë nën shifrën e 1 trilion dollarëve.

Dy nga tre tregtarët besojnë se tregu është i shtrenjtë, sipas anketës tremujore të mendimit të klientëve tregtarë të Charles Schwab. Megjithatë, tregtarët bullish ende janë më të shumtë se tregtarët bearish, me një raport 51 për qind ndaj 34 për qind.

“Është e qartë që shumica e tregtarëve besojnë se ka disa elementë të fryrjes në treg, por gjithashtu ndihen se ka ende hapësirë për bullat të vazhdojnë”, tha James Kostulias, kreu i shërbimeve të tregtimit në Charles Schwab.

Ndërkohë që pasiguria mbetet, disa strategjistë mendojnë se faktorët themelorë si fitimet e forta të kompanive do të shtyjnë aksionet lart.

“Ndonëse vazhdojmë të presim luhatje në të ardhmen ndërsa investitorët përballen me ndikimin e mundshëm të politikave të propozuara nga Trump, ne besojmë se tregjet do të rifokusohen te faktorët themelorë që duhet të mbështesin më tej rritjen e aksioneve”, tha Solita Marcelli, drejtoresha e investimeve për Amerikën në UBS Global Wealth Management. /Telegrafi/