Ministria e infrastrukturës ia huq për “Easy Jet”

Ministria e Infrastrukturës ka njoftuar se më 24 mars 2016, kompanisë “Easy Jet Airlines”, i është mundësuar hyrja në tregun e Kosovës, me ç’rast do t’i shfrytëzoj të drejtat e trafikut.

Por, duket se zyrtarët e këtij institucioni përgjegjës për leje të operimit duket se nuk e dinë se kjo kompani ka më shumë se pesë vite që operon në Kosovë.

Këtë e ka konfirmuar për Gazetën Fjala Valentina Gara, përgjegjëse për medie në Aeroportin e Prishtinës.

“Easy Jet si kompani ajrore operon në tregun e Kosovës që nga viti 2010. Gjatë kësaj periudhe Easy Jet dega në Zvicër është duke operuar me 6 fluturime për Basel dhe me 4 fluturime për Gjenevë. Ndërkaq nga ky muaj do të filloj me fluturime Easy Jet dega në Angli ku do të ketë 3 fluturime për Berlin. Fluturimi i parë inaugurues për këtë destinacion do të jetë ditën e diel me datë 27 mars 2016.

Ndërkaq, në njoftimin e Ministrisë së Infrastrukturës kjo kompani ka orar të fluturimit nga data 27 e këtij muaji. “Hyrja e një kompanie Ajrore nga Anglia, në tregun kosovar, është e një rëndësie të posaçme. “Easy Jet Airlines”, operon me low cost dhe do të ndikoj në zhvillimin konkurrues të aviacionit civil”, shkruan në njoftimin për media. /Gazeta Fjala/Telegrafi/