Meta në iniciativën Adriatiko-Joniane: Evropa nuk duhet të ngrejë mure

Kryetari i Kuvendit të Republikës së Shqipërisë, Ilir Meta, sot ka marrë pjesë në Konferencën e kryeparlamentarëve të Iniciativës Adriatiko-Joniane, që u mbajt në Split të Kroacisë. Sipas raportit që e transmeton AA, në të morën pjesë kryeparlamentarët e Shqipërisë, Kroacisë, Greqisë, Sllovenisë, Malit të Zi, Bosnje e Hercegovinës dhe Italisë.

Pjesëmarrësit në konferencë, pritës i së cilës ka qenë kryetari i Parlamentit të Kroacisë, Zhelko Reiner, kanë shkëmbyer ide rreth një zgjidhjeje gjithëpërfshirëse për krizën me emigrantët, si dhe për thellimin e bashkëpunimit në kuadër të Strategjisë Evropiane për Iniciativën Adriatiko-Joniane.

Kryeparlamentari i Shqipërisë, Ilir Meta, në fjalimin e tij është ndalur te kriza e refugjateve që ka përfshirë Evropën, e cila, siç shprehet ai, është problem evropian dhe si i tillë kërkon zgjidhje evropiane.

“Evropa nuk duhet të ngrejë mure. Shqipëria do bëjë pjesën e saj brenda mundësive në bashkëpunim me partnerët evropiane”, ka thënë mes tjerash Meta për të shtuar se BE nuk duhet ta shpërqendrojë vëmendjen nga Shqipëria sepse siç ka pohuar Meta, kriza kërkon koordinim evropian të strukturave të sigurisë dhe inteligjencës.

Në deklaratën e përbashkët të cilën e miratuan krerët e Parlamenteve të shteteve të lartpërmendura theksohet se bashkëpunimi në kuadër të Iniciativës Adriatiko-Joniane është kyç për zhvillimin e mëtejshëm të paqes, stabilitetit dhe mirëqenies në rajon si dhe për forcimin e përkrahjes për shtetet aspirante për anëtarësim në Bashkimin Evropian.