Majlinda do të shpërblehet me 40 mijë euro

Sipas rregullores që tashmë ka hyrë në fuqi për triumfin në kampionatin botëror të xhudos në Brazil, Majlinda Kelmendi do të shpërtblehet nga shteti i Kosovës me 40 mijë euro dhe 600 euro çdo muaj.

Përkujdesja institucionale nuk do të mungojë për kampionen e botës në xhudo, Majlinda Kelmendi. Kjo për shkak se muaj më parë është aprovuar shpërblimi për më të suksesshmit në lëminë e sportit më projektpropozimin e sponsoruar nga Ministria e Kulturës, Rinisë dhe Sportit.

Kështu, sipas kësaj rregullore, Majlinda e cila ka fituar titullin e kampiones botërore pritet të shpërblehet me 40 mijë euro nga buxheti i shtetit të Kosovës.

Në drafte parashihet që trajneri i sportistit apo sportistëve që kanë fituar medalje, do të marrë si shpërblim 50% të shumës së shpërblimit që merr sportisti.

Veç kësaj, Majlinda tashmë ka siguruar mbështetjen e përhershme nga ky ligj, që për titull kampioni të botës vlen nga 600 euro në muaj.

Kur fitoi medaljen e bronztë në kampionat evropian, Majlinda Kelmendi mori nga Ministri, Memli Krasniqi çekun prej 8000 euro, këtë herë ky çek do të jetë plotë 40 mijë euro./Sporti1/Telegrafi/