Krimi në Shqipëri më i ulët sesa mesatarja e krimit në BE

Kryeministri Sali Berisha iu adresua të martën konferencës “Ballkani në zemër të Evropës”, e iniciuar në Bruksel, nga Partia Popullore Evropiane (PPE), me pjesëmarrjen e personaliteteve nga vende të rajonit, anëtarë të Parlamentit Evropian dhe komisionarit për Zgjerimin në Komisionin Evropian, Stefan Fule.

“Vendi im tani është tani një vend me pagë mesatare pak më të lartë se një ose dy vende anëtare të BE-së. Muajin e kaluar, vendi im doli në tregun evropian dhe doli më mirë se disa vende të eurozonës. Sot, vendi im renditet 27 për qind më lart, se mesatarja e vendeve anëtare të OECD-së për sa i përket nisjes se biznesit, renditet 7 për qind më lart, se mesatarja e vendeve anëtare të OECD-së për investimet ndërsektoriale në vend”, tha Berisha duke shtuar se aseti më i madh i Shqipërisë është rinia.

“Ne jemi vendi më i ri në Evropë dhe jam i lumtur t’ju informoj se pavarësisht disa situatave shume të vështira në arsim, ne ia dolëm këtë vit të trefishojmë numrin e studentëve, në krahasim me katër vite më parë. Këtë vit, 92 për qind e nxënësve që mbarojnë arsimin 9-vjeçar vazhdojnë shkollat e mesme. 3-5 vite më parë, vendi im ishte në embrionet e erës digjitale, por tani ka një penetrim të ICT, nga 4,8 për qind në 43 për qind dhe ka një penetrim të ICT në shkolla më të lartë se disa vende anëtare të BE-së”, tha ai.

Duke folur për luftën kundër krimit në vend, kryeministri tha se mafia dhe krimi që ishin bërë të famshëm dhe të rrezikshëm në Shqipëri, janë tani më të ulët se mesatarja e BE-së. “Vendi im nuk ekzistonte në hartën e turizmit të botës, por këtë vit priti 3.5 milion turistë dhe të gjithë ata erdhën dhe ikën të sigurt nga vendi im”, sqaroi ai. /Telegrafi/