Kosova – vend me perspektivë në futboll

Kosova ka shumë trajnerë të zot dhe potencial të madh të lojtarëve, ka deklaruar Prof. Dr. Franko Ferrara pasi ka përfunduar qëndrimin dyditor në vend.

Eksperti italian i futbollit, i cili të premten dhe të shtunën ka qëndruar në Kosovë për një seminar me kryetrajnerët e skuadrave të Superligës së Kosovës dhe ndihmësit e tyre, mendon se Kosova është një vend me perspektivë në futboll.

“Për dy ditë sa punuam këtu pata rastin të shoh mjaft trajnerë të zgjuar dhe shumë futbollistë të mirë e të mençur, të cilët për mrekulli thithën dijen teorike dhe të cilën me mjaft përkushtim e demonstruan në praktikë”.

“Këtu pashë shumë trajnerë të zot dhe një potencial të madh të lojtarëve dhe kjo e bën Kosovën vend me perspektivë në futboll”, ka thënë Ferrara.

Krahas Ferrara në këtë seminar për trajnerët ka ligjëruar edhe drejtori teknik dhe instruktori i trajnerëve të Federatës Shqiptare të Futbollit, Prof. Astrit Maçi.

Në seminar është folur për shumë tema, që nga ndërtimi fillestar i një skuadre deri te një skuadër që duhet të përballojë edhe sfidat ndërkombëtare, ndërsa më pas është përcjellë edhe me punën praktike që u demonstrua në stadiumin “Agron Rama” në Kastrot me të rinjtë e skuadrës së KEK-ut. /Telegrafi/