Kosova me çmimet më të larta në rajon të produkteve ushqimore

Kosova është e rrethuar me vende që kanë çmime më të ulëta. Ndërsa, vet dominon me çmime të larta. KosovaPress ka blerë disa produkte të njëjta në katër vende: Prishtinë, Tiranë, Preshevë dhe Shkup, ku është vërtetuar që në Prishtinë, janë çmimet më të larta.

Çmimet  e ushqimeve në vendet e rajonit, pothuajse janë të njëjta me ato të  Evropës. Pavarësisht se këto vende, radhiten me shkallë të papunësisë së lartë.

Për të parë se në cilat vende janë çmimet më të larta, KP ka bërë një hulumtim. Në këto katër vende janë blerë: vaji, sheqeri, kripa, mielli, një pako vezë, kafe, qumësht, domate dhe qepë. E çmimet më të larta kanë qenë në Prishtinë.

1 litër vaj, një pako sheqer, miell, kripë, ve, kafe, qumësht, domate  dhe qepë, kanë kushtuar tetë euro e 66 cent, në njërën nga marketet e kryeqytetit.

E këto çmime, vështirë të përballueshme po janë për qytetarët. Hasan Syla nga Prishtina, thotë se  me pagat mujore që sigurojnë, është shumë vështirë të mbijetojnë.

“ Çmimet në krahasim me rrogat që i kemi  janë të larta. Ne i kemi  çmimet të barabarta me gjashtë shtetet e Evropës që janë. I kemi disa çmime të barabarta me ta. Kurse rrogat i kemi shumë më të ulta se ata… Ne i përballojmë po qysh i përballojmë, ne 30 për qind nuk mundemi me i përballu. Nuk përballohen me 75 euro me 150 euro. Një person i shpenzon ato, jo familja ”, ka thënë Hasan Syla.

E njëjtë thotë edhe Pajazit Halimi.

Halimi:Në Kosovë është një kllapë e madhe (Video)

“Çmimet këtu në Kosovë , për çmimet se jemi ne këtu si punëtor, që marrim pagën 250 euro, janë shumë të larta… në Kosovë është një kllapë e madhe, janë duke bërë me punëtorët maltretime me rroga 250 euro, kjo është një katastrofë e madhe”, tha Halimi.

Ali Hajra thotë se artikujt e përditshëm kanë një çmim të lartë, dhe se janë dyfishi i vitit të kaluar.

“Çmimet janë mjerisht të larta dhe kur dalin publikisht thonë, në vitin e kaluar kaq dhe tash një zero për qind ose një për qind janë më të larta që nuk është e vërtetë fare. Me artikujt që i kemi të përditshëm çmimet janë shumë shumë më të larta, dyfishi i vitit të kaluar. Ne ato në kurrizin tonë i hetojmë. Dhe është turp që me të vërtetë askushi nuk ndërmerr diçka për të pasur më tepër nën kontroll lëvizjen e çmimeve” tha ai.

Të njëjtat produkte janë blerë edhe në Preshevë. Të cilat kushtuan 6,88 cent.

Por, qytetarë të Preshevës thonë se  këto çmime janë katastrofale për të.

“Çmimet janë katastrofale krahasuar me qytetet e mdhaja , si për shembull Beogradi, Nishi. Paga nuk marrim hiç. Pagat janë shumë të ulta. Këtu ka do të thotë krizë”, tha ai.

“Duke e pasur parasysh papunësinë këtu, papunësinë e lartë që është dhe rrogat e ulëta, çmimet nuk janë edhe të ulëta. Janë më shumë se sa që duhet të jenë. Duhet të jenë më të ulta. Më shumë duhet punuar për të ulin papunësinë”,  tha Bina.

Të gjitha këto produkte në Shkup kanë kushtuar  tetë euro e gjashtë cent.

Brahim Kadrija  jeton në Zvicër, dhe sa herë që vjen në Shkup për pushime, thotë se shpenzon shumë, për shkak të çmimeve të larta.

“Nuk janë për neve shumë  të larta, por për këta që jetojnë këtu janë të shtrenjta. Më shtrenjt i kanë. Prej kur jam ardh 1000 franga i kam shpenzu”,tha ai.

Njëjtë thotë edhe Shaban Ajtini.

“Çmimet këtu janë shumë të larta dhe me rrogën e ktuhit, nuk mund të arrijmë. Për ne që punojmë jashtë, çmimet janë të vogla, amo për këta që jetojnë këtu janë shumë çmimet e larta”, tha ai.

Produktet të cilat janë blerë në Tiranë, kanë pasur çmim pothuajse të njëjtë me atë të Prishtinës. Të gjitha këto gjithsej  kanë kushtuar  tetë euro e 53 cent.

“ Në kuptimin e çmimeve, në atë se sa kemi të ardhura ne si pensionist, për neve janë një çik të shtrejta. Për mu, nuk i përballoj dot”, tha ai.

“ Krahasuar me tregun, duke filluar nga qiratë dhe me radhë, çmimet janë relativisht të larta…. Fajtor normalisht janë qeveritë, ata që programojnë zhvillimin e vendit. Normalisht ky vend do të kishte ecur me  hapa më të mirë të mirëqenies”, tha Hoxha.

“Unë si pensionist them që të paktën në familjen time përballojmë me vështirësi ato të cilat janë të domosdoshme. Pra, nuk bëhet fjalë për shpenzime shtesë”, tha Malolli.

Kosova, aktualisht ka 30 për qind të popullsisë të papunë. Papunësia më e theksuar është te femrat me 34.8%, krahasuar me meshkujt, 29.5%. Shkalla më e theksuar e papunësisë është te grupmoshat 15-24 vjeçare me 55.0%.