Koordinim diplomatik i ndërkombëtarëve për Shqipërinë

Kriza politike shqiptare do të ketë një trajtim ndryshe nga tradita e deritanishme e tranzicionit. Të mësuar me kompromise politike të orës së fundit apo rrugëdalje që vijnë përmes takimesh së dy ose tre politikanëve, qytetarët shqiptarë po vijnë në njohje të një realitetit, ku partnerët e huaj nuk sugjerojnë asnjë më shumë se sa zbatimin e ligjit.

Në këtë kuptim, shkruan gazeta Shqip, kursi i integrimit dhe ato arritje të deritanishme po sjellin në Shqipëri risinë e një zgjidhjeje përmes institucioneve dhe jo përmes kompromiseve politike nga emra të veçantë që aktualisht janë favorizuar si bartës të krizës politike.

Në këtë kontekst, sipas gazetës, vizita e Steinberg në Tiranë ka qenë thellësisht ndikuese. Burime diplomatike nënvizojnë se mesazhi më i qartë i ndihmëssekretarit amerikan të Shtetit, në takimet me kryeministrin Berisha, presidentin Bamir Topi, kryetarin e Partisë Socialiste, Edi Ra dhe prokuroren e Përgjithshme, Ina Rama, ka qenë ai për pavarësinë e institucioneve kushtetuese.

Por, një vërejtje indirekte nuk ka munguar edhe në këtë drejtim. “Të respektohet pavarësia e institucioneve kushtetuese, të cilat duhet të bëjnë mirë punën e tyre”, ka qenë apeli i Steinbergut.

Majde, një qasje e tillë është përcjellë edhe nga Departamenti i Shtetit si mision kryesor i tij në Shqipëri. “Në Shqipëri, ata (Steinberg dhe Countryman)do të përforcojnë rëndësinë e zgjedhjeve lokale në zgjidhjen e impasit politik dhe do të përforcojnë qëndrimin për rolin e Prokurorisë së Përgjithshme në hetimin e ngjarjes së 21 janarit”, thuhej në faqen zyrtare të Departamentit amerikan të Shtetit. /Telegrafi/