Konfiskohen rreth 22 kilogram marihuanë në kalimin kufitar Tabanoc

Dita e Drejtorisë doganore – 14 prilli, përpos me ceremoni, u shënua edhe me një konfiskim të suksesshëm të rreth 22 kilogram marihuanë.

Zyrtarët doganor të Njësitit për punë operative në bashkëpunim me Ministrinë e punëve të brendshme, më 14 prill të vitit 2016, rreth orës 23:20, në vendkalimin kufitar Tabanoc, në dalje të Republikës së Maqedonisë, veçuan për kontroll një automjet pasagjerësh me targa bullgare, drejtuar nga një shtetas bullgar, transmeton Telegrafi Maqedoni.

Gjatë kontrollit të detajuar të automjetit me anë të qenit doganor, në pjesën e poshtme të automjetit tek goma rezerve, nën parafangot e përparme, te dera e port bagazhit dhe nën plastikët e ulëseve të pasme, janë gjetur 40 paketime të mbështjella me shirit ngjitës dhe fletë alumini.

Paketimet kanë qenë të mbushura me materie të gjelbër baror. Pas matjes dhe testimit të kryer me anë të matësit të drogës, është konstatuar se bëhet fjalë për 21.7 kilogram marihuanë.

Droga e zbuluar dhe personi i janë dorëzuar Ministrisë së punëve të brendshme për procedim të mëtejmë./Telegrafi/