Konfiskohen 190 kuti me barna kontrabandë në vendkalimin kufitar Bellanoc

Gjatë ditës së shtunë në vendkalimin kufitar Bellanoc policia kufitare ka konfiskuar 190 kuti me barna me e500 tableta “daleron” pa dokumentacion përkatës.

Pas konstatimit të barnave kontrabandë janë ndaluar edhe dy shtetas me inicialet R.A.(64) nga fshati Llojanë e Likovës dhe S.R.(54) nga Kumanova.

“Me datë 25.02.2023 në ora 19:15, zyrtarët policorë nga Stacioni Policor i Vendkalimit Kufitar dhe Vëzhgimit Kufitar Bellanocë në Zyrën Rajonale për Çështje Kufitare Veri kanë ndaluar R.A.(64) nga fshati Llojanë e Likovës dhe S.R.(54) nga Kumanova. Përkatësisht, në fshatin Zllokukan të Likovës, gjatë tentativës për dalje të paligjshme nga Republika e Maqedonisë së Veriut, zyrtarët policorë kanë kontrolluar veturën e pasagjerëve “Opel Corsa” me targa të Kumanovës, e drejtuar nga RA, në të cilën pasagjer ishte SR. gjatë së cilës janë gjetur dhe konfiskuar 190 kuti me 500 tableta “daleron” pa dokumentacion përkatës. Ata janë ndaluar në komisariat dhe me ta është zhvilluar intervistë zyrtare”, thuhet në njoftimin e policisë.

Ata shtojnë se pas pas dokumentimit të plotë të saj do të vijojë parashtresa përkatëse./Telegrafi/