Kompjuterët tablet MeeGo në qershor

Kompania Intel ka për qëllim që në qershor të paraqesë zyrtarisht kompjuterët tablet të bazuar në sistemin operativ MeeGo 1.2. Prodhuesit e harduerit deri në atë muaj duhet të zhvillojnë versionet përfundimtare të pajisjeve, e demonstrimin e produkteve përfundimtare sigurisht do ta bëjnë në panairin Computex.

Në mesin e të parëve që do të paraqesin pajisjet e reja është edhe partneri i Intel- kompania Nokia. Tanimë kanë rrjedhë fotografitë e versionit të tabletit zhvillues të Nokias me sistemin operativ MeeGo dhe procesorin ARM Cortex-A9 me takt 1.2 GHz. Pos kësaj, Nokia përgatit edhe telefonin e mençur N9, po ashtu të bazuar në sistemin MeeGo, por i vënë në funksion me procesorin 32-nanometërsh të Atom me emër kodues Medfield.

Ani pse paraqitja e tabletëve MeeGo dhe pajisjeve tjera pritet gjatë qershorit, dërgesat e para më të mëdha me gjasë do të pasojnë në tremujorin e tretë, deri kur do të duhej të jetë i gatshëm edhe dyqani i aplikacioneve App Up. /Telegrafi/