Kombi kërkon qytetarin aktiv

Nuk e di se sa ky popull do të mund t’i shpëtojë krajatave të komformitetit aktual. Sa do të mundet, si kolektivitet, ta mbroj historinë, të kaluarën dhe si do ta përballojë grabitjen e sotme.

E tërë historia e këtij populli ka të bëj vetëm me ndrydhje, që nga territori e deri tek të gjitha vlerat që i ka pasur. Nuk janë të kota debatet për personazhet historike e kombëtare të mbështjella me ideologjitë fetare ne Kosovë, Shqipëri e Maqedoni. dhe gjithandej ku ka shqiptarë. Pastaj, tekstet shkollore për fëmijë nga të cilat kërkohet një gjuhë më e zbutur përballë historisë së Perandorisë Otomane. Nëse kështu vazhdon, besoj që edhe Skënderbeun, e Nënën Tereze dhe shumë figura të tjera, për një rrjedhojë kohore të brishtë, do t’i komfomizojnë. Ka rrezik që historia kombëtare. duke mos u mbrojtur, të ketë tabllo konformiteti, e cila ravijëzohet nga e kaluara në të tashmen, duke u denigruar sot përball turqve, nesër përball serbëve…

Shteti është krenar në vete, prandaj edhe qytetari përbrenda vetes ka arritur të përvetësojë vlera të krenarisë. Në këtë kontekst shqiptar, pa besuar në arritjen e bashkimit të kombit, qëndrimin gatitu para historisë kombëtare, ruajtjen e gjuhës dhe kulturës sonë, pa besuar në rimëkëmbjen ekonomike, religjionet të përvetësuara e të adaptuara në kulturën shqiptare duke e ruajtur natyrisht autonominë e tyre, vështirë që mund të kemi një perspektivë të gjithëdijshme kombëtare.

Nuk është që ky popull është lodhur dhe s’e reagimin e tij e ka të molepsur mbi situatën e përgjithshme politike dhe ekonomike. Puna qëndron në reagimin e gjithmbarshëm shqiptar, e që nuk e mbaj mend kur e ka pasur. Problemi qëndron këtu? shqiptarët nuk duhet të shohin vetëm bardh e zi. Nuk duhet të shikojnë ideologjikisht. As ekonomikisht. Ndërrimi vjen si rezultat i shtypjes, komformizmit që ta shpifë dhe territ që merr e mbretëron.

Besoj që pa u bërë mirë terr, e pa marrë fundosjen përfundimtare, e kemi humbur sensin e reagimit kombëtar.

Hallet e përditshme, ekonomike, familjare, na ka zhytur ne llumin e egoizmit personal, nihilizmit dhe defetizmit të vlerave që i kemi pasur. Sigurisht që kësaj i ka ndihmuar me plot vetëdije qeverisja antikombëtare e Thaçit, dhe po ashtu edhe qeverive të korruptuara dhe të kriminalizuara në Shqipëri, njashtu edhe pro-qeveritarëve në Maqedoni e Mal të Zi që për shqiptarët nuk e fituan asnjë të drejtë të njëmendtë…

Ky popull ka vullnet të reagojë, veçse duhet t’i kthehet vetes. Ka kohë që nuk ka reaguar dhe kur nuk reagon nuk është i lodhur. Ndryshe është jo-logjike. Për t’u lodhur duhet të harxhosh motive, e motivet duhet të kthehen në besime. E besimi është kombi.

Kombi përherë, pa dashur të kaloj në patetizma nacional, kërkon publikun reagues, e kërkon qytetarin aktiv. Sidomos në situata të jashtëzakonshme. Kombi sot ka një situatë të tillë.

E jashtëzakonshmja nuk flet. Ajo është kuturu, gjithkah, veçse duhen sy që nuk shohin bardh e zi. Duhet vullnet, besim e fuqi. E kjo e fundit pas dy të parave.