Kolegji Universum shënoi 10 vjetorin

Kolegji Universum ka shënuar 10 vjetorin e themelimit, në një ceremoni të organizuar në Hotelin Swiss Diamond, me praninë e shumë figurave nga arsimi, biznesi, kultura e politika. Mysafir i veçantë i kësaj nate ishte Janez Jansa, ish Kryeministër i Sllovenisë, disident dhe përkrahës i pareshtur i lirisë dhe pavarësisë së Kosovës.

Drejtuesit e Universum thanë se janë krenar për 10 vite të punës së suksesshme të Kolegjit Universum dhe se do të vazhdojnë t’i shërbejnë shoqërisë kosovare duke e ngritur edhe më lartë nivelin e arsimit në Kosovë dhe krijuar kuadro të gatshme për ti shërbyer zhvillimit ekonomik e shoqëror të vendit.

Ndërsa Janez Jansa tha se është i nderuar të jetë i pranishëm në këtë ngjarje dhe potencoi se ndihet si në shtëpi, ne mesin e miqve të rinj e të vjetër. Ai foli për marrëdhëniet e veçanta në mes të Kosovës dhe Sllovenisë dhe porositi të pranishmit të jenë krenar me të arriturat e vendit por edhe të shfrytëzojnë rininë dhe energjinë positive për të ecur përpara. Ai tha se Kosova është shtet dhe se si palë e barabartë duhet të negociojë me Serbinë ndërsa BE vetëm është këtu për të ndërmjetësuar.

Me 6 tetor, Janez Jansa laurohet me çmimin Doctor Honoris Causa nga Kolegji Universum për ‘kontributin e tij në lirinë dhe pavarësinë e Kosovës, demokratizimin e Ballkanit dhe fuqizimit të marrëdhënieve në mes të Kosovës dhe Sllovenisë’.

Kolegji Universum është institucioni lider i arsimit të lartë, i vetmi i ranguar në Top 1000 Shkollat më të mira të biznesit në botë nga Eduniversal. /Telegrafi/