KMDLNj kritikon procesin gjyqësor të Speciales: Gjykatë raciste, mbi Kushtetutën dhe shtetin e Kosovës

Këshilli për Mbrojtjen e të Drejtave dhe Lirive të Njeriut (KMDLNj) ka reaguar ashpër ndaj veprimeve të fundit të Gjykatës Speciale, duke e cilësuar atë si një institucion “racist, mbi Kushtetutën dhe mbi shtetin”.

Në reagimin e tij, KMDLNj ka dënuar arrestimin e ish-pjesëtarit të UÇK-së, Fadil Fazliu, ish-shefin e AKI-së, Bashkim Smakaj, ish-kryetarin e Malishevës, Isni Kilaj dhe bastisjen e shtëpisë së
Hajredin Kuçit, duke theksuar se këto veprime janë kryer në mënyrë të padrejtë dhe të motivuar politikisht.

“Policia e Kosovës po merr pjesë, në cilësinë e punëtorit fizik, gjatë bastisjeve dhe arrestimeve të shqiptarëve, kryesisht ushtarë të UÇK-së dhe përkrahës të luftës,” thuhet në reagim.

KMDLNj e konsideron këtë si një akt të papranueshëm dhe të turpshëm.

Në reagim, KMDLNj thekson se Gjykata Speciale po shkel ligjet dhe Kushtetutën e Kosovës, duke vepruar në mënyrë selektive dhe diskriminuese ndaj shqiptarëve.

Lexo po ashtu Aktakuza e re nga Specialja, Kuçi dhe Kilaj dalin sot para trupit gjykues

“Kjo gjykatë ndan ‘drejtësi’ sipas kriterit etnik,” thuhet më tej, duke theksuar se mbi 90% e viktimave shqiptare nuk janë trajtuar si të tilla, ndërsa shumica e krimeve të kryera nga forcat serbe janë lënë të pandëshkuara.

Këshilli e cilëson këtë si një formë të hapur të diskriminimit dhe mohimit të drejtësisë për shqiptarët.

Për sa i përket procesit gjyqësor ndaj ish-presidentit Hashim Thaçi, Kadri Veselit, Jakup Krasniqit dhe Rexhep Selimit, KMDLNj deklaron se procesi është i pandershëm dhe i ndikuar politikisht.

“Deri më tani nuk është marrë asnjë vendim në favor të të akuzuarve,” thuhet në reagim, duke kritikuar gjithashtu mungesën e transparencës dhe shkeljen e parimit të prezumimit të pafajësisë.

Këshilli ka vënë në dukje se të gjitha vizitat, qoftë të privilegjuara apo jo, janë përgjuar, ndërsa kërkesat për një proces të drejtë dhe të paanshëm janë refuzuar.

Në fund të reagimit, KMDLNj propozon disa masa për të mbrojtur të drejtat e të akuzuarve, përfshirë monitorim ndërkombëtar dhe vendor të proceseve gjyqësore, refuzimin për t’iu përgjigjur pyetjeve në rrethana ekzistuese dhe greva urie për të sensibilizuar opinionin publik.

“Ky devijim juridik po dhunon ligjet dhe sovranitetin juridik të Kosovës në mënyrë brutale,” përfundon reagimi, duke bërë thirrje që institucionet e reja të ndërmarrin hapa konkretë për rishikimin ose zhbërjen e Gjykatës Speciale, nëse ajo nuk respekton ligjet dhe Kushtetutën e Kosovës. /Telegrafi/