Kënga e re e Alban Skënderajt flet për krizën në çift (Video)

Në intervistën e parë pas publikimit të këngës “Unë dhe ti”, Alban Skënderaj thotë se ka punuar me këtë projekt muzikor siç nuk bën zakonisht.

I ftuar në programin e mëngjesit Wake Up, kantautori i njohur ka treguar më shumë detaje për periudhën gjatë së cilës ka munguar në muzikë, për këngën e fundit, por edhe për marrëdhënien e tij me Miriam Canin.

Si një dedikim për dashurinë e sakrificave, “Unë dhe ti” erdhi ashtu siç e kishte dëshiruar vetë Albani – për çiftet që kanë kaluar shumë vështirësi bashkë.

“Të gjitha çiftet, mendoj që kanë diçka që i bashkon. Të gjithë kanë kaluar mes vështirësive. Ne shqiptarët, kemi kaluar shumë probleme ekonomike, sociale, kemi ndjerë shtypjen e diktaturës, e ndonëse ne jemi një brez i ri, kemi shenja nga këto vështirësi. Unë doja të bëja një këngë universale ku secili gjen veten. Edhe klipin doja që të bëhej nga vetë njerëzit”, ka thënë ai, transmeton revista Class.

Nëse në sytë e të gjithëve, Miriam-Alban janë çifti perfekt, kantautori tregon sinqerisht se edhe marrëdhënia e tij, si e të gjithëve, ka pasur krizat e veta.

“Kemi pasur kriza, si çdo çift, por mendoj që çdo ditë duhet të punosh që të ushqesh raportin, dashurinë, vazhdimësinë, jetën… Edhe kjo këngë këtë mesazh kërkon të përçojë: është shumë e lehtë të jesh egoist, të jesh vetjak, siç bëhet shpesh sot në jetë, por nëse do që një raport të funksionojë duhet të bësh sakrifica e të jesh i fortë në momente të vështira, të durosh, të pranosh, të respektosh…”, ka theksuar Albani duke treguar se të dyve iu është dashur të jenë tolerantë.