Kapiteni i pakënaqur

Kapiteni legjendar i Sigal Prishtinës, Edmond Azemi, ka bërë të ditur se ndihet i pakënaqur në klub për shkak të minutazhes së vogël në ndeshje.

Të gjithë e njohin Azemin si njërin ndër luftëtarin më të madh në parket të Sigal Prishtinës, dhe njeriun që pothuajse nuk ka munguar në asnjë ndeshje, duke e bartur kështu gjithmonë përgjegjësinë e skuadrës mbi supet e tij. Megjithëkëtë, përforcimi i skuadrës me katër lojtarë të huaj ka bërë që kapiteni të mos ketë hapësira shumë në ndeshje dhe ta ngrohë bankën rezervë, gjë e cila po e bën atë të pakënaqur.

Ju kujtojmë se edhe Alban Veseli ka shprehur pakënaqësinë e tij ndaj klubit ditëve të fundit, pasi që edhe ai gjendet në të njejtën situatë si Edo.

Në një prononcim për Arena, ‘Edo’ ka theksuar se e meriton të luajë më shumë, duke qenë edhe një nga shtyllat e klubit ‘bardhekaltër’ ndër vite. “Sigurisht se jam i pakënaqur me minutazhën. Ne lojtarët vendorë dhe posaçërisht unë, kemi qenë bartës të shumë sukseseve të klubit të Prishtinës dhe mendoj se e meritojmë të luajmë më shumë. Trajneri po bazohet shumë në lojtarët të huaj, duke mos na lënë shumë hapësirë ne vendorëve. Albani është vetëm i pari që ka shprehur hapur pakënaqësinë. Ai është i ri dhe sigurisht se ka nevojë për më shumë minutazhë për t’i treguar cilësitë e tij”.

“Personalisht kam luajtur në shumë liga për shumë vjet dhe sigurisht se do të doja ta ndihmoja më shumë klubin në përfaqësimin ndërkombëtar, pasi një gjë të tillë e kam pritur me vjet”, shtoi Azemi për gazetën. /Telegerafi/