UP-ja organizon edicionin e 16-të të Universitetit Veror Ndërkombëtar të Prishtinës

Universiteti i Prishtinës “Hasan Prishtina”, këtë vit organizon edicionin e 16-të të Universiteti Veror Ndërkombëtar të Prishtinës.

Universiteti Veror Ndërkombëtar i Prishtinës mbahet nga datat 4-15 korrik 2016, ndërsa aplikimi për studentët vendor dhe ndërkombëtar është i hapura deri më 30 prill 2016.

Të drejtë aplikimi kanë të gjithë studentët e nivelit Bachelor dhe Master të universiteteve, kolegjeve brenda dhe jashtë Kosovës.

Këtë vit, Universiteti Veror Ndërkombëtar i Prishtinës ofron gjithsej 11 kurse (lëndë) që u përkasin fushave të ndryshme të studimit, të cilat ligjërohen nga profesor ndërkombëtar dhe vendor dhe në përfundim të këtij programi studentët certifikohen dhe marrin 4 kredi (ECTS).

Përveç aktivitetit akademik, përgjatë këtij programi zhvillohen edhe një serë aktivitetesh tjera, si: forume, punëtori të ndryshme, ekskursione, gara sportive, mbrëmje studentore, vizita të ndryshme dhe aktivitet të tjera.

Për gjithë studentet vendor dhe të rajonit (Shqipëri, Serbi, Mali i Zi, Bosnje dhe Hercegovinë, Maqedoni) aplikimi është pa pagese (bursa).

Në këtë përfshihen: qëndrimi në konvikt, ushqimi në mensë dhe aktivitete të tjera që do të realizohen në kuadër të Universitetit Veror të Prishtinës.

Ndërsa për studentët që u përkasin vendeve të Bashkimit Evropian dhe vendeve nga e gjithë bota, duhet të paguajnë një shumë simbolike prej  100 € (euro). /Telegrafi/