I ftohti rrezik i shtuar për t’u prekur nga A/H1N1

Periudha e ftohtë e dimrit është koha më e ndjeshme për t’u prekur jo vetëm nga gripi sezonal, por edhe nga gripi i derrave, i njohur si A/H1N1.

Sipas profesor Naser Ramadanit, Drejtor i Institutit për Shëndetësi Publike, derisa virusi i gripit sezonal lulëzon në vjeshtën e vonshme dhe dimër, virusi A H1N1, i cili shkakton gripin e derrave, nuk ka një periudhë të caktuar të paraqitjes.

Por periudha e ftohtë vazhdon të mbetet rrezik më i rritur për t’u prekur nga ky lloj virusi. Përveç rënies së imunitetit te njerëzit në këtë kohë, arsyeja qëndron edhe në faktin se ata zakonisht grumbullohen në hapësira të mbyllura të cilat më rrallë ajrosen.

“Gripi A/H1N1 nuk është si gripi sezonal që paraqitet kryesisht në periudhën e ftohtë, por megjithatë kjo periudhë është më e rrezikshmja edhe për t’u prekur nga ky lloj i virusit”, ka thënë Ramadani për Telegrafi.

“Te ky lloj gripi nuk ka një sezon të caktuar të paraqitjes, megjithatë rreziku është më i madh gjatë periudhës së ftohtë, pra në vjeshtën e vonshme dhe në dimër”.

“Arsyeja është se njerëzit në këtë stinë grumbullohen në vende të mbyllura, të cilat hapësira nuk ajrosen dhe kjo rrit gjasat që ai të përhapet më shpejt”, shton më tej Ramadani.

Gripi vazhdon të jetë në qendër të vëmendjes së shëndetësisë në botë me më shumë se pesë mijë të vdekur në gjithë botën që kur për të parën herë shpërtheu më herët gjatë këtij viti. Në Kosovë ende nuk kemi asnjë vdekje, por kemi gjashtë raste të konfirmuara.

Për të marrë informata rreth gripit A/H1N1 dhe masave të parandalimit, si the rreth dallimit mes ftohtes dhe gripit sezonal mund të lexoni artikujt e mëposhtëm:

Çfarë është gripi i derrave?

Gripi i derrave: Shenjat dhe parandalimi

Ftohja e zakonshme dhe gripi

/Telegrafi/