Hyseni kërkon ndihmë për më shumë njohje të Kosovës

Gjatë qëndrimit në Strasburg, ministri i Jashtëm i Republikës së Kosovës, Skender Hyseni, pati një varg takimesh me eurodeputetë nga disa vende evropiane.

Hyseni është takuar me Jacek Saryusz-Wolski, kryetar i Komisionit për Politikë të Jashtme të Parlamentit Evropian, të cilin e ka njoftuar për “përparime të dukshme në Kosovë, ndërtimin e institucioneve demokratike dhe në funksionalizimin e tyre, për të qenë në shërbim të plotë të të gjithë qytetarëve të Kosovës së pavarur, pa marrë parasysh përkatësinë etnike të tyre”.

Hyseni po ashtu ka njoftuar atë për përpjekjet që po bëjnë institucionet e Kosovës për akomodimin e pjesëtarëve të bashkësive etnike të Kosovës, e në veçanti të asaj serbe.

Ai ka kërkuar nga Satyursz-Wolski që Komisioni që drejton ai, por edhe Parlamenti Evropian në tërësi, të angazhohet edhe më tej për të ndihmuar institucionet e Kosovës në rrugën e fitimit të më shumë njohjeve për Republikën e Kosovës shtet të pavarur dhe sovran, duke filluar nga vendet anëtare të Bashkimit Evropian që ende nuk e kanë njohur Kosovës.

Satyusz-Wolski ndërkaq, siç bëhet e ditur në një komunikatë të Ministrisë së Jashtme, e ka përgëzuar ministrin Hyseni për të arriturat e Kosovës dhe ka premtuar ndihmë edhe në të ardhmen. Ai ka përgëzuar Qeverinë për punën që po bën në planin e akomodimit të komuniteteve dhe ka kërkuar që këto përpjekje të vazhdojnë edhe më tej.

Në vazhdën e aktiviteteve në Strasburg, ministri i Jashtëm Kosovës ka takuar edhe Jose Ignacio Salafranca Sanchez-Neyra, koordinator i Grupit EPP-ED në Komisionin për Politikë të Jashtme në Parlamentin Evropian, pastaj Hannes Swoboda, nënkryetar i Grupit PSE dhe anëtar i Parlamentit Evropian dhe me Martin Kamp, sekretar i përgjithshëm i Grupit EPP-ED në Parlamentin Evropian.

Në të gjitha këto takime, ministri i Jashtëm i Kosovës ka kërkuar intensifikim të përpjekjeve për të bindur pesë vendet anëtare të BE-së që ende nuk e kanë njohur Kosovën. /Telegrafi/