Hendboll: Kosova U-18 në European Open

Përfaqësuesja e Kosovës U-18 (në konkurrencën e femrave) do të marrë pjesë në "EUROPEAN OPEN", i cili prej 29 qershor e deri më 5 korrik do të zhvillohet në Geteborg të Suedisë.

Kjo është hera e parë që një Përfaqësuese e Kosovës në sportet kolektive merr pjesë në një garë zyrtare.

Hendbollistet e Kosovës tash e tri ditë janë duke u përgatitur në Gjakovë dhe shpresojnë që në këtë turne të paraqiten sa më mirë.

Përzgjedhësi i Përfaqësueses së Kosovës, Alfred Llazari thekson se po bëhen të gjitha përpjekjet që para shkuarjes në Geteborg hendbollistet të arrijnë formën më të mirë. “Ne po e vazhdojmë punën tonë dhe e rëndësishme është fakti që do të marrim pjesë në këtë garë. Pavarësisht pengesave që po përpiqen të na i bëjnë të tjerët, rruga jonë drejt ndërkombëtarizimit të plotë nuk ka të ndalur dhe në këtë vazhdë është edhe pjesëmarrja në Geteborg. Synimi ynë është që atje të paraqitemi sa më mirë dhe në këtë mënyrë t’u tregojmë të gjithëve se edhe tek ne ka hendboll dhe se izolimi shumëvjeçar ka qenë absolutisht i padrejtë”, ka thënë Llazari. /Tribuna/Telegrafi/