​Haziri kujton martirët e Lladovës, në 21-vjetorin e vrasjes mizore

Kryetari i Komunës së Gjilanit, Lutfi Haziri, në 21-vjetorin e masakrës në fshatin Lladovë, ka kujtuar sakrificën që banorët e këtij fshati kanë kaluar duke respektuar deri në gjunjëzim veprën për të rënët nga kjo masakër në vitin 1999.

Ai me këtë rast tha se Lladova, por edhe Gjilani dhe e gjithë Anamorava, gjithmonë do ta mbajnë në mend këtë ditë të tmerrit që ndodhi këtu.

“Jemi duke kaluar shumicën e kohës në organizim maksimal për parandalimin e pandemisë Covid-19, mirëpo assesi nuk mundemi dhe nuk guxojmë të harrojmë sakrificën që banorët e Lladovës dhe Karadakut kanë dhënë në luftën për liri. Aty është derdhur gjak që sot të jemi të lirë. Ai gjak është i njomë edhe sot dhe gjithmonë sa të jetë kjo jetë, sepse ata ranë në luftën për liri dhe të tillë do të mbeten vazhdimisht. Ata janë themeli i lirisë dhe gjunjëzohemi para veprës së tyre”, tha Haziri.

Përndryshe, nga regjimi serb, në Lladovë u vranë mizorisht, Beqir Mahmuti (1953), Zijadin Mahmutit (1960), Daut Mahmuti (1963), Hevzi Ajeti (1970), Ganimete Ajeti (1977) dhe Ahmetali Ajeti (1960), ky i fundit i vrarë dhe i zhdukur.

Po ashtu, në Gjilan është vrarë edhe Xhemail Ymeri nga Lladova, kurse i plagosur rëndë kishte mbetur Mefail Ajeti.