Google ka çaktivizuar të dhënat e trafikut në aplikacionin Maps për të mbrojtur ukrainasit

Google ka çaktivizuar përkohësisht të dhënat e trafikut të drejtpërdrejtë të ofruara nga aplikacioni Maps në Ukrainë dhe qëllimi është të mbrojë përdoruesit në këtë vend që u sulmua nga Rusia.

Veçoria e trafikut të drejtpërdrejtë përdor të dhënat anonime të vendndodhjes të mbledhura përmes pajisjeve Android për t’u treguar përdoruesve se ku janë bllokimet e trafikut dhe cilat dyqane kanë shumë njerëz. Megjithatë, ekspertët besojnë se të dhëna të tilla mund të shërbejnë si një pasqyrë e ecurisë së pushtimit. Një nga ekspertët tha se ai vuri re shenjat e pushtimit rus herët të enjten e kaluar, pasi vuri re një “bllokim trafiku” të pazakontë në kufirin ukrainas përmes aplikacionit Google Maps.

Google mori vendimin për të çaktivizuar funksionin e përmendur për të mbrojtur përdoruesit lokalë dhe pas konsultimeve me autoritetet ukrainase. Nuk ka më një qasje globale për funksionin, por ai është ende i disponueshëm për drejtuesit që përdorin navigimin kthesë pas kthese në rajon.

Të dhënat e vendndodhjes të mbledhura nga shërbimet e hartës shpesh japin rezultate të papritura. Kur aplikacioni i gjurmimit të fitnesit Strava publikoi një hartë të aktivitetit të përdoruesve në vitin 2017, ai zbuloi aksidentalisht vendndodhjet e disa bazave ushtarake amerikane që tregonin se ku ushtarët vraponin rreth aeroportit.

Gjithashtu, gjeolokacioni i Snapchat u përdor për të mbledhur foto dhe klipe nga fronti gjatë luftës në Irak. Me ose pa të dhëna për vendndodhjen, informacioni i shpërndarë në zonat e luftës në mediat sociale është bërë një mjet kyç për hetuesit, gazetarët dhe të tjerët.

Këto të dhëna zakonisht kombinohen me burime të tjera për të marrë informacion të besueshëm. Në rastin e bllokimeve të trafikut jashtë Ukrainës të enjten, hetuesit kanë shqyrtuar tashmë imazhet satelitore, ndërsa të dhënat e smartfonëve ndoshta janë gjeneruar kur civilët u ndaluan në barrikada, në vend të ushtarëve që përdornin telefonat celularë Android. /Telegrafi/