Gashi: Së pari zyrtarët e shtetit, pastaj qytetarët, duhet të trajnohen për mbrojte të të dhënave

Çështja e privatësisë dhe mbrojtja e të dhënave të qytetarëve, sidomos kur janë të kyçur në përmbajtje mediatike, është një temë për të cilën ka folur Kujtim Gashi, ish-drejtor i Agjencisë së Shoqërisë së Informacionit.

Gashi thotë se duhet trajnim i stafit që punon nëpër institucione të vendit që ata fillimisht të dinë rëndësinë e mbrojtjes së të dhënave, e më pastaj edhe qytetarët.

“Unë e shoh një sfidë serioze. Më tepër se që duhet të vetëdijesohen qytetarët, duhet zyrtarët e institucioneve që në një masë nuk e kanë njohurinë dhe përgjegjësinë e duhur se sa e rëndësishme është ruajtja e të dhënave. Qytetarët kanë shumë të dhëna në shumë sisteme që i ekspozojnë ato pa dijeninë e tyre në mungesë të informacioneve. Në anën tjetër janë zyrtarët e shtetit që kanë qasje në të dhënat tona e në mungesë të respektimit të praktikave dhe politikave që duhet të ekzistojnë dhe të plotësohen disa akte të tjera ligjore që secili institucion përkatës të vë rregull dhe standardet që të ndjekë rekomandimet dhe udhëzimet e AIP-së. Kjo do të ulte në masë të madhe lëshimet e mëdha që mund të bëhen si rezultat i asaj që ne për çdo ditë mund t’i ekspozohemi në masë të madhe abuzimit nga kategori dhe grupe të caktuara që kanë për qëllim përdorimin të të dhënave tona personale, si mediat sociale, sistemet e ndryshme që përdoren”, deklaroi Gashi, për Klan Kosova.

Si profesor i mbrojtjes së të dhënave, Gashi tutje shtoi se qytetarët nuk duhet të japin të dhëna të ndjeshme në platforma të pasigurta dhe të mos vendosin fjalëkalime të lehta e të thjeshta. Po ashtu, ai kërkoi që qytetarët të mos vendosin një fjalëkalim të njëjtë në shumë platforma apo aplikacione.

Mes tjerash, Kujtim Gashi vlerëson se qytetarët bien pre e mos njohurive të tyre, teksa thotë se fëmijët dhe të miturit janë më të cenuarit.

Ai thotë se “vjedhja e të dhënave të bankës, të dhënave të kartelave bankare ose të dhënat e profileve, identiteteve, janë sfidë serioze edhe në vendin tonë”.

“Gjatë kohëve të fundit, një numër shumë i madh i përdoruesve u është ekspozuar rreziqeve të tilla”, përfundoi Gashi.