Futbollit i rikthehet shkëlqimi

Pas një nisme aspak të mirë, në të cilën mungoi disiplina në fushë e tribuna, pastaj pati shumë pakënaqësi edhe te gjyqtarët, ku nuk munguan as njëshat në adresë të tyre, sikur u krijua një përshtypje se futbolli ynë ka hyrë në një “qorrsokak”. Mirëpo, java e 5-të ishte ajo që dëshmoi se në Kosovë ka futboll, ka spektakël dhe mbi të gjitha ka tifozë korrektë, që duhet t’ia kenë lakmi edhe shtetet fqinje.

Gjithsesi, meritat kryesore për këtë gjë i shkojnë Dritës e Prishtinës, skuadra këto që dhanë ndeshje të bukur, derisa për një spektakël në tribuna u përkujdesën tifozët e Dritës që ishin të shkëlqyer, si dhe Plisat në anën tjetër të tribunës. Rivalitet i madh si në fushë ashtu edhe në tribuna kaloi në mënyrë sportive pa asnjë incident. Kjo është ajo që kërkohet nga tifozët dhe klubet, kjo është ajo që i duhet futbollit.

“Mbrëmë kam bërë gjumë të rehatshëm. Spektakël në tribuna, futboll i bukur në fushë, gjykim i drejtë e mbi të gjitha anim korrekt”, kështu e ka përshkruar këtë javë kryetari i gjyqtarëve të Kosovës, Përparim Hasani, gjyqtarët e të cilit në javët e kaluara u kritikuan ashpër nga trajnerët. Por me këtë u pa se kur ata kanë siguri dhe nuk kanë presion dinë ta ndajnë mirë drejtësinë.

“Futbolli luhet për shikues edhe prania e një numri të konsiderueshëm të tyre e gjallëron vetë futbollin, dhe është motiv për futbollistët. Unë po shpresoj që të vazhdohet me atmosferë të tillë siç ishte në Gjilan edhe në stadiumet tjera”, ka thënë mesfushori i Prishtinës, Azem Ahmeti i cili në përballje me Dritën, i priu skuadrës së “bardhekaltër” duke bartur shiritin e kapitenit. Ai atmosferën në Gjilan e përshkruan si shumë të mirë dhe se aty u luajt vetëm futboll.

“Në ndeshjen me Dritën, ishte një atmosferë shumë e mirë. Futbolli ynë ka nevojë për aso pamje. Atmosfera në stadium ishte shumë e mirë e mbi të gjitha animi ishte korrekt”, tha Ahmeti.

Gjithsesi, Drita këtë herë mori notë pozitive, por ajo që vazhdimisht po ofron spektakël dhe po kënaq të gjithë është Vushtrria. Tifozët e saj po e mbushin stadiumin dhe me atmosferën që krijojnë duhet t’i kenë lakmi të gjithë.

“Sivjet është më mirë, në të gjitha stadiumet ka tifozë më shumë. Sa i përket Vushtrrisë, është kënaqësi të luash aty. Në ditën e zhvillimit të ndeshjes në qytet është sikur festë, nga mëngjesi aty flitet vetëm për futboll. Stadiumi, gjithmonë është plotë dhe vërtet them se ata shikues e meritojnë titullin e kampionit”, tha ish sulmuesi i Prishtinës, Faton Zejnullahu që sivjet iu bashkua skuadrës vushtrriase, Llamkos Kosova.

Ajo që duhet thënë është se futbollit tonë po i kthehet shkëlqimi. Shpresojmë të vazhdohet me këtë ritëm, derisa klubet suksesin ta kërkojnë vetëm përmes lojës së treguar në fushë, kjo i kënaq tifozët, kjo i kthen ata në tribuna. Të vazhdohet kështu, në mënyrë që java e 5-të të mos mbetet vetëm shembull për të mirë. /Zëri/Telegrafi/