Filmi “Cheers”: Shokë të pijes

Një fëmijë që dëshiron të rritët para kohës njoftohet me jetën që mund ta presë atë.

Filmi i shkurtër “Cheers”, me regji dhe skenar nga Norika Sefa, është një film i mbushur me aktorë të famshëm e të dëshmuar. Andi Bajgora, Luan Jaha, Bislim Muqaj, Nëntor Fetiu, Veton Osmanaj dhe Xhelal Haliti e paraqesin në mënyrë shumë reale një atmosferë të zakonshme të një kafeneje të rakisë në Prishtinë.

Lisi, një djalë i vogël i cili mbledh metale për të jetuar, pas një dite të mirë në “biznes” shkon tek kafeneja e shokëve të tij më të vjetër dhe u paguan për të ngrënë e për të pirë nga paratë e fituara të metaleve, por me gjithë dëshirën që të jetë njëri nga ta, ai nuk e gjen vetën në një mes të tillë. Ai detyrohet që të pijë raki, t’i shikojë të dehurit tek bëjnë probleme të zakonshme impulsive, dhe tenton që t’i ndjekë ata dhe veprimet e tyre.

Duke e gjetur vetën në një vend ku nuk mundet të përshtatët, me gjithë dëshirën e tij, Lisi e kupton që vendi i tij nuk është në një kafene të rakisë. Ai siç duket mes të rriturve e kupton që fëmijëria është gjëja më e shtrenjtë që ka, dhe nuk do që të përfundojë si një pijanec ditor në njërën prej kafeneve të qytetit.

Skena të mira, aktrim profesional, ngjarje e thellë, dhe realizim perfekt i këtij filmi të shkurtër. Shikojeni të plotë në http://qkk.gjirafa.com/