Edo: Do ta mposhtim Pejën

Kapiteni i Prishtinës, Edmond Azemi, zotohet se kryeqytetasit do t’iu hakmerren pejanëve për humbjen që u kanë shkaktuar në fillim të edicionit, para derbit bastketbollistik të së dielës përballë Pejës.

Në ndeshjen e xhiros së dytë, Peja mposhti Prishtinën me 31 pikë dallim, ndërsa kapiteni i Prishtinës, beson se ka ardhur koha për revansh.

“Besoj se do t’i revanshohemi Pejës për humbjen e shkaktuar dhe do t’i mposhtim. Gjithsesi do të jetë një ndeshje e vështirë, pasi që skuadra pejane ka një ekip mjaftë cilësor”, u shpreh ai për gazetën “Sport”.

Edmond Azemi ka folur edhe për formën e tij të mirë që po kalon së fundi, dhe për rezultatet pozitive që nxjerr skuadra prishtinase.

“Jemi duke kaluar në një formë të mirë. Kemi arritur rezultate të mira dhe lojëra të bukura. Tashmë jemi kompozuar dhe që normalisht se edhe rezultatet nuk kanë munguar deri më tani”.

“Kam filluar te rikthehem në formën time më të mirë, dhe kjo është meritë e trajnerit i cili më ka besuar dhe më ka lënë të luaj në pozitën time dhe normalisht që nëse unë luaj aty ku dua dhe ndjehem më mirë atëherë forma ime do të jetë në nivel”, ka shtuar më tej Azemi. /Telegrafi/