Ec e kurdis ndeshje!

Më fund, Federata e Futbollit e Kosovës (FFK) ka ndërmarrë masa konkrete për t’i luftuar kurdisjet e rezultateve të ndeshjeve të futbollit kosovar. Madje, lufta e FFK-së ndaj këtij fenomeni ka nis me të filluar kampionati i ri. Shtëpia e futbollit kosovar tashmë e ka formuar Komisionin e Hetuesisë, i cili thuajse është i gatshëm për ta hetuar çfarëdo ndeshje, e cila në vazhdim të këtij edicioni, mund të dyshohet si e kurdisur.

Fjala është për një Komision Hetues shumë serioz, siç e konsideron sekretari i shtëpisë së futbollit kosovar, Eroll Salihu. “Komisioni Hetues është gati. Bëhet fjalë për një Komision të kombinuar, që përbëhet nga njerëz të Hetuesisë dhe Policisë shtetërore, e po ashtu nga njerëz të FFK-së”, ka deklaruar për Arenën Salihu.

“Ky Komision do ta hetoj në detaje çdo ndeshje e cila do të dyshohet si e kurdisur. Ndëshkimi i rreptë do t’i pret të gjithë ata që tentojnë të merren me këtë fenomen. Ne të mërkurën eventualisht të enjten do t’i njoftojmë edhe klubet, por edhe opinionin. Do të ketë zero tolerancë ndaj kurdisjeve eventuale”, shpjegoi Salihu. /Tribuna/Telegrafi/