Dy nga të burgosurit rusë që u liruan si pjesë e shkëmbimit të madh Lindje-Perëndim duan të kthehen në Rusi

Dy nga disidentët rusë që u liruan nga burgu dhe mbërritën në Gjermani si pjesë e shkëmbimit të madh të të burgosurve Lindje-Perëndim të javës së kaluar thonë se tashmë po mendojnë të kthehen në Rusi, por zotohen të vazhdojnë aktivizmin politik edhe nga jashtë.

Shkëmbimi bëri që tetë rusë, përfshirë një vrasës të dënuar, të ktheheshin në shtëpi nga vendet perëndimore në këmbim të 16 të burgosurve të liruar nga burgjet ruse dhe bjelloruse, shumë prej tyre disidentë rusë së bashku me amerikanët si gazetari i Wall Street Journal, Evan Gershkovich.

“Si njerëz që në fakt u deportuan, të cilët u dëbuan nga vendi, ne të gjithë kemi një dëshirë të madhe të kthehemi”, tha disidenti Andrei Pivovarov.

“Unë patjetër dua të jem në Rusi. Unë jam një politikan rus dhe kjo është shumë e rëndësishme për mua”, shtoi Pivovarov.

“Por, është e qartë se ata nuk do të na lejojnë të kthehemi, edhe pse ne duam”, vazhdoi ai duke iu referuar autoriteteve ruse.

Ndërkohë, edhe Ilya Yashin, aktivist i opozitës ruse i burgosur në vitin 2022 për kritikimin e pushtimit të plotë të Ukrainës nga presidenti Vladimir Putin, shprehu gjithashtu dëshirën e tij për t’u kthyer në shtëpi, shkruan Reuters, përcjell Telegrafi.

“Jam vërtet i mërzitur nga dëbimi im nga Rusia, pavarësisht gjithë mirënjohjes që ndjej ndaj atyre që më uruan mirë dhe më shpëtuan”, tha Yashin.

“Por unë sinqerisht them se vendi im është në Rusi. Unë ia kam kushtuar jetën vendit tim”, shtoi ai.

Yashin tha se ishte i lumtur që shihte familjen dhe miqtë e tij për herë të parë pas një kohe të gjatë.

Por, nga ana tjetër, ai tha se kjo është “një hap i vështirë për t’u gëlltitur”.

“Është shumë e vështirë për mua emocionalisht, sepse e kuptoj që u lirova me çmimin e lirimit të një vrasësi, një person që në fakt kreu një krim të përgjakshëm”, tha Yashin.

Kjo i referohej Vadim Krasikov, një rus i dënuar për vrasjen e një ish-militani çeçen në Berlin në vitin 2019, i cili ishte në mesin e të liruarve.

“E thashë disa herë që nuk doja të isha pjesë e ndonjë liste shkëmbimi”, shpjegoi Yashin.

“Përfaqësuesit e Kremlinit e përfshinë me kënaqësi emrin tim, sepse për ta shkëmbimi im në thelb do të thotë dëbim”, shtoi ai.

Ndryshe, Pivovarov tha se dëshiron të vazhdojë me aktivitetet e tij opozitare nga jashtë Rusisë.

“Koordinimi i çdo gjëje nga brenda është i pamundur. Nuk po planifikoj të tërhiqem”, tha ai. /Telegrafi/