Drejtori i BIBL-së i pakënaqur me tifozët kosovarë

Drejtori sportiv i Ligës Ballkanike, Shay Shtriks, ka gjetur disa mangësi, të cilat tha se duhet të evitohen. Zyrtari i lartë i këtij evenimenti e kritikoi ashpër sjelljen e tifozëve në Superkupë, duke paralajmëruar zero tolerancë për klubet kosovare në BIBL.

Shay Shtriks nuk është ndarë i kënaqur plotësisht nga ajo çka pa, në vizitën që ia bëri Kosovës. Drejtori sportiv i Ligës Ballkanike ka gjetur disa behane, të cilat tha se duhet të evitohen. Zyrtari i lartë i këtij evenimenti e kritikoi ashpër sjelljen e tifozëve në Superkupë, duke paralajmëruar zero tolerancë për klubet kosovare në BIBL. Ai po ashtu kërkoi më shumë respekt për gjyqtarët. Ajo që i pëlqeu ishte cilësia e klubeve. Shtriks mendon se Peja dhe Prishtina mund të futen në Top 6 të evenimentit që ai e drejton.

Drejtori sportiv i Ligës Ballkanike, Shay Shtriks ka gjetur behane në basketbollin kosovar, pas vizitës që e pati në vend, ku ndërkohë ishte prezent edhe në ndeshjen e Superkupës ndërmjet Pejës dhe Sigal Prishtinës.

Ai është ndarë i kënaqur me cilësinë e treguar në parket nga lojtarët, por jo edhe me gjërat tjera që e kompletojnë një ndeshje basketbolli.

Shtriks është ankuar në sjelljen e tifozëve, të cilët edhe një herë e treguan anën e tyre të errët dhe të egër, duke hedhur gjësende në fushë, përfshirë këtu copa karrigesh, duke u sharë dhe pë një fije floku mund edhe të përlesheshin fizikisht.

“Është kënaqësi që jam këtu. Ndeshja ishte interesante, por s’kam qenë i lumtur me shumë gjëra, që i mungojnë basketbollit tuaj. Dallon loja nga ndeshja në tërësi, ku shikohet edhe niveli organizativ, që është mjaft me rëndësi. Sjelljet e tifozëve ishin nën nivelin e duhur. Shikuesit më shumë ishin të fokusuar të përlesheshin me njëri me tjetrin, sesa ta shikonin lojën. Është me rëndësi që t’i ndërroni gjërat, duhet që bashkërisht ta ndryshoni këtë qëndrim”, deklaroi fillimisht zyrtari i lartë i Ligës Ballkanike, në një konferencë për shtyp të mbajtur të premten në Prishtinë.

Ai paralajmëroi dënime të rënda për klubet kosovare dhe për tifozët, në rast se sjellje të tilla përsëriten në evenimentin ballkanik, ku nga ky sezon do të marrin pjesë edhe dy ekipe nga Kosova.

“Përmes këtyre dy klubeve duhet ta ngrejmë në një nivel më lartë basketbollin kosovar. Ju bëj apel që ta ndërroni qasjen. Duhet që në palestër t’u ofrohet mundësia të vijnë më shumë fëmijë, femra dhe familjarë. Në Ligën Ballkanike nuk kemi probleme. Do të ketë zero tolerancë për klubet që shkaktojnë probleme në ligën tonë. Për hedhjet e gjësendeve në fushë do të ketë sanksione të rënda. Në Ballkan Ligë luhet pa probleme. Do të punojmë bashkërisht me Federatën tuaj për t’i ndalur këto dukuri”, vijoi ai.

Ndër të tjera, Shtriks pati kritika edhe për lojtarët dhe trajnerët, për qasjen e tyre ndaj gjyqtarëve. “Niveli i gjyqtarëve mu duk mjaft i lartë, krenohuni me ta. Por, lojtarët dhe trajnerët duhet të kenë respekt më të madh ndaj tyre”, tha ai.

Sa i përket cilësisë së këtyre klubeve, ai mendon se e kanë të përafërt me ekipet tjera të Ligës Ballkanike dhe u shpreh i bindur se ekipet tona do të shkojnë larg në debutimin e tyre në këtë kompeticion.

“Peja dhe Prishtina duken dy ekipe shumë të mira, edhe pse është fillimi i sezonit. Mendoj se mund të futen në Top 6 të Ligës Ballkanike”, vazhdoi Shtriks. /Express/Telegrafi/.