Drejtë Hungarisë në të zezën: Ja çfarë do të përjetoni…!

Mungesa e institucioneve në Kosovë, humbi shpresat e shumë të rinjve për një jetë më të mirë në Kosovë. Andaj shumë prej tyre u nisen në rrugë ilegale drejtë Evropës.

Përfituesit e kësaj vale të njerëzve në këto rrugë janë të shumtë, ndërsa humbësit më të mëdhënj janë ata që udhëtojnë në këto rrugë, pra vet këta të rinj dhe familjet e tyre. Sepse realisht nga gjithë kjo valë e madhe e të rinjve, janë të paktë ata që do ia arrijnë të shkojnë atje për ku janë nisur.

Në vazhdim do të shpjegoj në detaje se çka ndodhë kur të rinjtë nga Kosova hyjnë ilegalisht në Hungari. Sepse, meqë jetoj në këtë vend dhe pjesë e popullit tim po ikën, i dhashë vetës të drejtën të shkoj nëpër disa stacione trenash dhe të takohem e të bisedoj me disa nga këta. E, pastaj bëra një hulumtim të ngjarjeve dhe pasojave.

Ata sapo të shkelin tokën e Hungarisë, ndalen nga policia hungareze, identifikohen dhe kontrollohen në detaje për gjithçka që posedojnë. Këta të rinj nuk kanë me vete shumë gjëra, por çdonjëri prej tyre mesatarisht posedon rreth njëmijë euro. Shteti hungarez nuk i dërgon asnjërin prej këtyre nëpër kampe të mbyllura, sepse nëse i dërgon atje, atëherë nuk kanë ku t’i shpenzojnë ato njëmijë euro.

Policia, sapo i regjistron mirë në sistemin elektronik të sigurisë, ua lëshon një letër të formatit A4 ku ua jep të drejtën e lëvizjes së lirë brenda Hungarisë dhe ua përcakton vendin e lajmërimit në qytetin Debrecen. Kjo me një qëllim të vetëm: që këta të rinj t’i shpenzojnë ato euro që kanë dhe pastaj të shkojnë në kampin për refugjatë për të ngrënë bukë të skaduar, bukë të cilën në fakt e paguajnë vet, sepse shpenzimi i atyre mijëra eurove nëpër hotele e nëpër bileta trenash hyjnë në fakt në ekonominë e Hungarisë.

Isha vet prezent kur një grup të rinjsh nga Kosova, në stacionin e trenit në Keleti Palyaudvar, i blenë biletat Budapest-Munih. Stacioni i trenit dhe të gjitha rrugët nëpër Budapest janë të pajisura me videokamera të sigurisë, kështu që sapo erdhi treni në peronin numër 9, të rinjtë kosovarë hynë në tren. Pas tyre hyri edhe policia, ua mori biletat dhe i zbriti në tokë duke ua rikujtuar që dokumentet që posedojnë nuk ua japin të drejtën e udhëtimit jashtë Hungarisë. Policia i kishte parë shumë mirë ata derisa blinin biletat, por nuk i ndali në atë pikë, e çuditshme apo jo!?.

Paret e biletës rreth 100 Euro për person u avulluan brenda pesë minutave. Treni u nis për Munih, ndërsa të rinjtë nga Kosova u kthyen në një hotel të vogël për të avulluar paratë e tjera të mbetura.

E njëjta gjë ndodhë kur këta të rinj paguajnë ndonjë taksi, për të ikur në rrugë magjistrale, apo nëpër ndonjë stacion autobusi lokal. Janë të pakët ata të rinj kosovarë që dinë të jenë aq të përgatitur për t’ju ikur këtyre rrjetave të sistemit të sigurisë, kështu që shumica e tyre, sapo të shpenzojnë paratë, përfundojnë në kampin e refugjatëve në Debrecen, ku marrin një përvojë të hidhur. E, rezultati final është kthimi në Kosovë.

Një rrugëtim i tillë, përveç që është dhimbje, është edhe varfërim i mëtejshëm për ata dhe për familjet e tyre.

Nëse dikush mendon që ia vlen kjo aventurë, nisuni. Por, përveç zhgënjimit nuk do gjeni asgjë tjetër.

Për politikanët që ishin në gjendje ta lënë Kosovën pa institucione që nga qershori, dua t’ua kujtoj këtë thënie popullore: "Buka e Kosovës shumë kujt ia ka thye qafën".