“Do të gjykojnë vetëm më të drejtit”

Ardhja në krye të Komisionit të Gjyqtarëve të Futbollit, të gjyqtarit më të mirë të viteve të fundit, Përparim Hasani, besohet se do të sjellë risi te këmishëzinjtë. Deshëm apo jo, ata ishin pika më e kritikuar në vitet e kaluara, gjë kjo që sipas Hasanit më nuk do të ndodhë. Ai beson se referimi do të ngrihet dhe se në futbollin tonë do të gjykojnë vetëm më të mirët.

“Them të drejtën shumë më mirë paskam qenë si gjyqtar aktiv se sa tash në këtë pozitë. Përgjegjësi është më e madhe dhe përveç kësaj duhet shumë punë për të sjellë atë që unë synoj”. Kështu tha në fillim të bisedës Hasani, të cilit sigurisht që do t’i mungojë fusha, por edhe profesioni i ri nuk është diçka e panjohur për të. Sipas Hasanit, referimi në Kosovë viteve të fundit ka ngritje dhe ai beson se me të kampionati që është në prag të fillimit do të jetë edhe më në nivel sa i përket ndarjes së drejtësisë.

“Duhet të pranojmë që ka vend për përmirësim. Këto do të bëhen me punë dhe vullnet të mirë. Ne synojmë që përmes seminareve të shumta t’i avancojmë edhe gjyqtarët e rinj por edhe të ndrisim maksimalisht referimin”, tha ai për Zërin, i cili ndeshjen e fundit si gjyqtar aktiv e pati në ndeshjen miqësore që u zhvillua në Prishtinë, ndërmjet Yjeve dhe FC Prishtinë.

Hasani thotë se nga kjo e diel, kur edhe mbahet testi i normave fizike dhe teorike për gjyqtarët e Superligës, do të ketë një pasqyrë shumë më reale se cilët gjyqtarë do të garojnë e cilët jo.

“Të dielën janë normat. Dhe unë ju siguroj se do të kalojnë më të mirët. Nuk mund të flas për të kaluarën por them se këtë herë do të jemi rigoroz në detyra. Nuk do të ketë lëshime dhe do të ecin përpara vetëm ata që janë përgatitur dhe kanë punuar për këto norma”, shtoi numri një i gjyqtarëve kosovarë. Ai ka siguruar se nën udhëheqjen e tij në fushë do të jenë vetëm ata që meritojnë të jenë aty e jo të bazohemi në përvojë apo diçka tjetër.

“Rregulloret ekzistojnë dhe ato do t’i respektojmë. Do të gjykojnë vetëm gjyqtarët që janë nën 45 vjet. Sigurisht që të gjithë do të jenë të barabartë para meje dhe vetëm nga puna e tyre do të varet nëse do të ndajnë drejtësinë apo jo”, tha Hasani për Zërin. /Telegrafi/