Digjitalizohet Universiteti i Prizrenit “Ukshin Hoti”

Pas aplikimit online të gjeneratës 2013/2014, që nga afati i provimeve të janarit, studentët e Universitetit të Prizrenit “Ukshin Hoti”, do të mund t’i paraqesin provimet, të përcjellin rezultatin e tyre, pagesat dhe të kryejnë një sërë shërbimesh tjera, të gjitha online.

Prof. Dr. Zahadin Shemsedini, ushtrues i detyrës së Rektorit në Universitetin e Prizrenit “Ukshin Hoti” dhe Adem Sallauka, Sekretar i Përgjithshëm i këtij universiteti, të hënën kanë shpërndarë ID-kartelat për studentët e vitit të parë të gjeneratës 2013/2014, përmes të cilave ata do të mund të qasen në sistemin online.

Shemsedini e vlerësoi si hap të madh të suksesit, digjitalizimin e universitetit.

Ndryshe, tani e tuje studentët më nuk do të presin në sportele për të bërë paraqitjen e provimeve dhe për të kryer shërbime të ndryshme administrative, por të gjitha do t’i kryejnë online.

Kjo mënyrë i ofron studentit qasje në të gjitha shërbimet që i ofrohen studentëve në sistem. Shërbimet kryesore të sistemit janë: zgjedhja e lëndëve obligative dhe zgjedhore te mësimdhënësi përkatës ku ai ka ndjekur ligjëratat, paraqitja e provimeve, rezultatet, pagesat, transkripta e notave. /Telegrafi/