Dibra pa kadastër nëntokësor

Kadastri nëntokësor është një dokument i cili është shumë i nevojshëm për postën dhe kompanitë të cilët merren me ndriçimin elektrik të qytetit. Edhe ata kanë pajisje dhe kabllo në shumë vende të qytetit nën tokë. Me përgatitjen të një dokumenti të këtillë qyteti i Dibrës definitivisht do t‘i tejkalojë të gjithë problemet që kompanitë dhe ndërmarrjet hasin gjatë defekteve.

Tanimë me vite flitet për nevojën që qyteti i Dibrës të ketë një kadastër nëntokësor. Është një dokument urbanistik tejet i nevojshëm meqë aktualisht asnjë nga institucionet të cilët kanë realizuar dhe kanë vendosur pajisje nëntokësore nuk dihet ku i kanë. Problemet nga mungesa e kadastrit nëntokësor sidomos i ndjen ndërmarrja komunale publike “Standardi”, e cila furnizon qytetin me ujë, por jo vetëm ajo. Kadastri nëntokësor i duhet edhe kompanisë që menaxhon me rrjetin elektrik, postës, etj.

Drejtoria e ndërmarrjes komunale publike “Standardi”, ka informuar se udhëheqësia e re e saj mes prioriteteve ka edhe përgatitjen e dokumentacionit për kadastrin nëntokësor. Drejtori i kësaj ndërmarrje Burim Kaba për gazetën KOHA thotë se kadastri nëntokësor është një dokument primar për ndërmarrjen që ai udhëheq. Prandaj janë ndërmarr të gjithë aktivitetet që së shpejti të fillojë dhe realizimi i këtij projekti shumë domethënës për qytetin e Dibrës. “Kadastri nëntokësor është një dokument i cili ka të dhëna primare për rrjetin e ujit. Deri tani edhe pse rrjeti për furnizimin me ujë të qytetit të Dibrës është vendosur pas Luftës së Dytë botërore, respektivisht viteve të 50-ta, Dibra deri sot nuk ka një dokument të këtillë. Kadastri nëntokësor është një vlerë urbanistike e cila lehtëson edhe punën e mirëmbajtjes të rrjetit të ujësjellësit. Prandaj me përkrahje të pushtetit vendor ne si drejtori veçmë i kemi ndërmarr aktivitetet e para për të përgatitur një kadastar nëntokësor në përputhje me ligjet dhe në bashkëpunim me institucionet që janë kompetente në këtë fushë”, thotë drejtori Kaba dhe shton se është optimist se një dokument i këtillë do të përgatitet shumë shpejt.

Në mungesë të një dokumenti të këtillë ku nuk dihet ku kalon rrjeti primar i furnizimit me ujë, rrjeti sekondar etj, gjatë defekteve paraqiten probleme të mëdha. Dekada me radhë nuk është përgatitur një dokument i këtillë dhe prandaj besojmë si drejtori që projekti duhet të realizohet shumë shpejt, shprehet Kaba.

Biseduam edhe me disa udhëheqës por edhe punëtorë të kësaj ndërmarrje komunale që kanë punuar vite më parë për të mirëmbajtur rrjetin me furnizim të ujit në Dibër. Ata thonë se ka ndodhur viteve të 70, 80, 90 por edhe më vonë kur ishin ende në jetë punëtorë të cilët kanë vendosur rrjetin e ujit që të pyeten se ku përafërsisht gjendet rrjeti gjatë defekteve. Prandaj një dokument i këtillë urbanistik është tejet i nevojshëm potencojnë në ndërmarrjen komunale “Standardi” e cila menaxhon me ujësjellësin rajonal Rosok-Dibër.

Por, kadastri nëntokësor është një dokument i cili është shumë i nevojshëm për postën dhe kompanitë të cilët merren me ndriçimin elektrik të qytetit. Edhe ata kanë pajisje dhe kabllo në shumë vende të qytetit nën tokë. Me përgatitjen të një dokumenti të këtillë qyteti i Dibrës definitivisht do t’i tejkalojë të gjithë problemet që kompanitë dhe ndërmarrjet hasin gjatë defekteve. Poashtu me kadastrin nëntokësor përcaktohen edhe të drejtat dhe obligimet për ata që posedojnë rrjetin nëntokësor. (koha.mk)