Dhimbja kronike ndryshon trurin

Durimi i dhimbjeve afatgjate ndikon në funksionimin e trurit madje edhe në kryerjen e detyrave të cilat kërkojnë minimumin e vëmendjes, dhe të cilat, në asnjë mënyrë, nuk kanë ndërlidhje me dhimbjen. Mu për këtë njerëzit janë më të prirë ndaj depresionit.

Skenimi i trurit të pacientëve me dhimbje kronike dëshmon aktivitet të vazhdueshëm në pjesë të trurit, të cilat do të duhej të pushonin, që është një zbulim i cili do të mund të sqaronte pse pacientët me dhimbje janë më të prirë ndaj depresionit, shqetësimit dhe çrregullimeve tjera, kanë njoftuar shkencëtarët amerikanë.

Dhimbjet kronike, siç duket, ndryshojnë mënyrën sipas së cilës truri përpunon informacionet të cilat nuk janë të lidhura me dhimbjen, thonë shkencëtarët.

"Duket se durimi i dhimbjeve afatgjate ndikon në funksionimin e truri, madje edhe në kryerjen e detyrave të cilat kërkojnë minimumin e vëmendjes, dhe të cilat, në asnjë mënyrë, nuk kanë ndërlidhje me dhimbjen", kanë shkruar shkencëtarët në revistën Journal of Neuroscience.

Dante Chialvo nga universiteti Nothwestern në Chicago, i cili ka punuar në studim, ka deklaruar se, njerëzit të cilët jetojnë me dhimbje kronike "kanë shumë gjëra tjera që ndikojnë në kualitetin e jetës së tyre po aq sa edhe dhimbja. Nuk është e njohur se prej nga vijnë ato".

Studimet e fundit kanë dëshmuar se tek njerëzit e shëndoshë, gjatë pushimit, aktivizohen pjesë të caktuara të trurit.

Kur personi kryen ndonjë punë, ato pjesë të trurit çaktivizohen, gjë që nuk ndodh edhe me personat të cilët vuajnë nga dhimbja kronike. Në vend të saj, gjithmonë është aktiv korteksi i lobit frontal i cili në masë të madhe është i lidhur me emocionet, e me këtë çrregullohet edhe baraspeshimi normal.