Certifikohen 22 pjesëtarë të FSK-së në përdorimin e sistemit elektronik për menaxhimin e pasurisë

Është mbajtur ceremonia e certifikimit të 20 pjesëtarëve të FSK-së dhe 2 pjesëtarë të stafit civil të MFSK-së, të cilët u aftësuan për përdorimin e sistemit ektronik për menaxhimin e pasurisë nga Agjencia e Shoqërisë së Informacionit (ASHI).

Me këtë rast, sekretari i përgjithshëm i MFSK-së, Shkëlzen Sylaj, në emër të Ministrisë dhe ministrit Demolli falënderoi ASHI-në për trajnimin e pjesëtarëve të stafit civil të MFSK-së dhe pjesëtarëve të FSK-së, duke theksuar se trajnimi për menaxhimin e pasurisë është mjaft domethënës dhe i rëndësishëm për FSK-në.

Ai, po ashtu përgëzoi edhe pjesëtarët e FSK-së për zhvillimin me sukses të këtij trajnimi, i cili, siç tha ai, do t’i pajisë me njohuri të reja rreth përdorimit të sistemit elektronik për menaxhimin e pasurisë së FSK-së.

Sipas njoftimit, në emër të ASHI-së, foli Kujtim Gashi, i cili vlerësoi lartë angazhimin dhe përkushtimin e pjesëtarëve të FSK-së, për t’u pajisur me njohuri të reja në këtë drejtim. Ai tha se “ është ndjenjë e veçantë të përgatisë ekspertë të FSK-së, sepse pasuria më e madhe e vendit tonë është vet FSK-ja.

Ndërkaq, koloneli Donahoe përgëzoi pjesëtarët e FSK-së për kryerjen me sukses të këtij trajnimi shumë të rëndësishëm, ndërsa drejtori i Drejtorisë së Operacioneve, gjenerali Zymer Halimi, i uroi pjesëtarët e FSK-së për suksesin e treguar gjatë trajnimit, njëherësh kërkoi nga ta që njohuritë e fituara t’i zbatojnë me sukses në njësitë e tyre.

Ceremonia u mbajt në ambientet e Ministrisë për Forcën Sigurisë së Kosovës(MFSK), në organizim të Departamentit të Logjistikës.