Bunjaku: Deklarata e De Biasit ishte e ngutshme

Përzgjedhësit të Kosovës, Albert Bunjaku nuk i ka ardhur fortë mirë deklarata e Gianni de Biasit, para takimit të tyre që do të realizohet të dielën në Tiranë. Përzgjedhësi i Kombëtares Shqiptare, De Biasi, deklaroi një ditë më parë se në takim do të bisedojnë për lojtarët kosovarë, që sipas tij duhet të zgjedhin ose Kosovën ose Shqipërinë.

“Me Bunjakun do të takohemi dhe të flasim për lojtarët kosovar. Ata duhet ta kenë parasysh që duhet të luajnë o me Shqipërinë o me Kosovën dhe jo të thonë që duam të luajmë miqësoret me Kosovën dhe zyrtaret me ne”, kishte thënë De Biasi për mediat shqiptare. E Bunjaku, mendon ndryshe. Ai thotë se kjo deklaratë është pak e ngutshme.

“Unë mendoj që është pak e ngutshme dhe këtë duhet ta kemi si mundësi dhe jo pengesë. Mendoj se përderisa ne mund të marrim lojtar nga Zvicra, Suedia apo Finlanda, pa asnjë komunikim me federatat e tyre, të cilët lojtarë mund të luajnë edhe për Kombëtaret tjera, atëherë nuk duhet të jetë diçka e veçantë me Shqipërinë, përkundrazi ne duhet të jemi më të lidhur. Për mua kjo është një mundësi e mirë për zhvillimin e futbollit mbarëshqiptar, duke marrë parasysh proceset ku gjendemi, sepse fundja as unë e as De Biasi nuk mund t’i ndalim proceset e as vendimet e lojtarëve, të cilat janë individuale”, ka thënë Bunjaku. /Arena/Telegrafi/