Bie interesimi për vaksinim në Kërçovë

Dozën e parë të vaksinës kundër Covid-19, në Kërçovë e kanë pranuar 19 mijë qytetarë. Dozën e dytë rreth 17 mijë, ndërsa të tretën janë vaksinuar vetëm 1830 qytetar. Për drejtorin e Shtëpisë së Shëndetit në Kërçovë Xhabir Bajrami, shifrat e të të vaksinuarve me dozën e tretë janë të kënaqshme, por shqetësues është fakti se dukshëm ka rënë interesimi për personat që ende nuk e kanë marr dozën e parë dhe të dytë.

“Mua më vjen keq pse ka rënë interesimi për marrjen e dozës së parë, ndërsa për dozën e tretë deri diku puna na shkon mirë, d.m.th. për një muaj ne kemi vaksinuar 1830, sot i numërova të gjitha specifikat ju jap të dhëna të sakta. P.sh vetëm ditën e djeshme nga numri i përgjithshëm që vaksinuam rreth 70 deri 100 qytetar, diku 43 ishin me dozën e tretë, ndërsa 15 me dozën e parë”, tha Xhabir Bajrami, drejtor i Shtëpisë së Shëndetit Kërçovë.

Mjeku Bajrami apelon deri te qytetarët që të vaksinohen sa më shumë sepse, siç thotë, pritet që në janar ose shkurt të kemi një valë tjetër të virusit të llojit Omikron.

“Piku ose kulmi i variantit të ri të virusit Covid Omikroni pritet të vijë në janar-shkurt te në Maqedoni, me ardhjen e mërgimtarëve me lëvizjen e qytetarëve dhe ne që të shpëtojmë nga ky variant i cili është tepër infektues është më infektues se varianti Delta, prandaj bëjmë thirrje të merret doza e tretë”, pohoi Xhabir Bajrami, drejtor i Shtëpisë së Shëndetit Kërçovë.

Në qendër Covid të Kërçovës për momentin të shtruar janë rreth 10 pacientë të infektuar, numër ky i ulët në krahasim me muajin gusht, kur qendra Covid ishte e stërmbushur dhe brenda një muaji betejën me Covid e humbën rreth 37 persona./TV21/