Bau Academy thellon bashkëpunimin me partnerët gjerman

Si shkolla e vetme e mesme profesionale e kësaj natyre në Kosovë, Bau Acadamey po ndërmerr hapa domethënës në realizimin e idesë së një shkolle me standarde evropiane të shkollimit në profilet qe tashmë ajo ofron: instalues elektrik, instalues tubacioneve të ngrohjes, klimatizimit dhe ujit, metalpunues & saldator dhe ndërtimtari.

Tashmë Al Trade Holding si themelues i shkollës ka përfshirë si bashkëaksionar edhe dy partner gjerman: Kolegjin Heimerer dhe kompaninë gjermane Amberg Bau GmbH & Co. KGK. Në këtë mënyrë shkolla e mesme profesionale Bau Academy tashmë është një investim i përbashkët kosovaro–gjermane.

Kolegji Heimerer është institucion gjermano-kosovar në Kosovë, i cili bazament të tij ka institucionin arsimor gjerman Heimerer GmbH me përvojë 40-vjeçare në arsim profesional, në 11 qytete te ndryshme të Gjermanisë, përfaqësuar nga Friedrich Heimerer dhe Institutin e Evropës Juglindore për Politika Shëndetësore dhe Sociale, përfaqësuar nga Petrit Beqiri.

Kolegji Heimerer synon që duke ofruar kualifikime cilësore profesionale në fushat shëndetësore të vendos standarde evropiane në hapësirën e kualifikimeve profesionale në Kosovë.

Amberg Bau GmbH & Co. KG është kompani elite ndërtimore gjermane me seli në LANDSBERG AM LECH, e cila veprimtarinë e saj ndërtimore e ushtron në tërë rajonin e Bayernit dhe merret me ndërtime të projekteve të ndryshme.

Norbert Kees, njëherit edhe pronari i Amberg Bau GmbH & Co.KG, përveç që e ka trashëguar këtë veprimtari nga gjyshi i tij, Philip Amberg, që nga viti 1935 të cilën vazhdon ta ushtroj edhe më shumë, ai gjithashtu është edhe Kryeshef i shoqatës së ndërtimtarëve në rajonin e Bavarisë së Epërme.

Mbi këtë bazë, partnerët gjermanë do të marrin përsipër menaxhimin e sistemit pedagogjik të Bau Academy, me qëllim që në këtë shkollë të zbatohet standardi gjerman në të mësuar. Ndër dobitë e shumta të kësaj marrëveshjeje vlen të theksohet se gjatë tri viteve të shkollimit, për të gjitha drejtimet kurrikulat e të cilave janë harmonizuar me sistem arsimor gjerman, nxënësit e këtyre drejtimeve do të kenë mundësi që të kryejnë praktike deri në 9 muaj tek kompanitë gjermane. Rrjedhimisht, diplomat e marra në Bau Academy për drejtimet kurrikulat e të cilave janë harmonizuar me sistemin arsimor gjerman do të njihen edhe në Gjermani. Kësisoj, përveç aftësive teknike të marra në laboratorët e shkollës, nxënësit e Bau Academy do të aftësohen për punë të standardeve gjermane.

Bashkëpunimi mes të këtyre tri kompanive çimenton idenë e shkollës Bau Academy si alternativa e vetme për sa i përket shkollimit profesional në Kosovë me standarde evropiane.

Shkolla e mesme profesionale Bau Academy ofron aftësim profesional që ju siguron një integrim me dinjitet në tregun e punës.