Barazia gjinore fillon në familje

Pjesëmarrësit e një tryezë të organizuar tw premten nga OSBE kanë bërë thirrje për të drejta të barabarta të femrave në pronë dhe trashëgimi, vetëdijesim të publikut për këtë temë, bashkëpunim më të mirë ndërmjet autoriteteve dhe masa proaktive nga gjykatat.

Në konferencë morën pjesë përfaqësues të shoqërisë civile, autoriteteve qendrore e lokale, si dhe të organizatave ndërkombëtare. Pjesëmarrësit identifikuan si problem kryesor faktin që femrat në Kosovë tradicionalisht nuk trashëgojnë, dhe zakonisht heqin dorë nga hisja në pronë.

“Ky diskriminim ndaj femrave është i padrejtë dhe fillon në familje ku femrat heqin dorë nga e drejta për të marrë hise. Kjo është një nga shumë sferat ku femrat janë të diskriminuara. Nëse familja nuk i trajton fëmijët në mënyrë të barabartë, nuk mund të pritet as nga shoqëria që të veprojë ndryshe,” tha Markku Laamanen, zëvendës Shefi i Misionit të OSBE-së.

Me qëllim të parandalimit të këtij përjashtimi të femrave nga trashëgimia që i margjinalizon ato në familje dhe në shoqëri, pjesëmarrësit e tryezës hartuan një numër rekomandimesh për akterët relevant.

Rekomandimet përqendrohen në tri fusha kryesore: informimi publik, sidomos në shkolla dhe pjesët rurale; përmirësim të bashkëpunimit mes strukturave administrative në nivel lokal; gjykata dhe procedura ligjore.

Konferenca është pjesë e punës së Misionit të OSBE-së në promovimin dhe monitorimin e të drejtave të njeriut. /rtv21/