Ballistët premtojnë atmosferë SHQIPTARE në Beograd

Tifozët e klubit Shkëndija, “Ballistët”, kanë thënë se ata do të udhëtojnë në Beograd pa asnjë frikë dhe se do të mundohen ta nxjerrin në pah identitetin shqiptar të klubit.

Kampioni i Maqedonisë më 13 korrik udhëton në kryeqytetin serb për takimin e rundit të parë eliminues të Ligës së Kampionëve përballë Partizanit të Beogradit. Policia serbe javë më parë tha se do të burgosë të gjithë ata që do të ngrenë flamurin shqiptar ose të Kosovës në këtë takim, duke qenë se klubi prezanton Maqedoninë. Por kjo nuk do t’i pengojë tifozët shqiptarë të këndojnë shqip dhe të nxjerrin në pah ngjyrat kuqezi.

“Tanimë UEFA e dha lejen. Policia serbe është obliguar të garantojë ndeshjen në të gjitha aspektet, nuk ka nevojë për panik, “Më mirë një ditë “luan” se sa një jetë “lepur”! Në të gjithë duhet ta dimë një gjë se, data 13.07.2011 (e mërkurë) për të gjithë shqiptarët është ditë ku "kufijtë e hekurt" do hapen dhe historia do shkruhet ndryshe”, shkruhet në deklaratën e tifozëve të klubit tetovar.

“Pse ti mbyllim sytë në ditën kur kombi, Tetova, Shkëndija dhe Ballistët përfaqësohen nga një zë, nga zëri ynë, nga zëri që ruajti energji shekuj me radhë, për t’u bërë më i fuqishëm se kurrë, pikërisht në këtë ditë. Tanimë erdhi koha, na mbetet të tregojmë se sa e mbajmë fjalën dhe se sa i qëndrojmë besnik klubit që çdo ndeshje ia kemi kënduar Himnin madhështorë "Besa Besë"! Pse mos t’i lëmë arsyet e paarsyeshme anash, në vend të tyre të krijojmë atmosferë, ashtu si i ka hije një derbit ballkanas!”.

“Ata po presin t`i dhurojnë emocion adhuruesve shqiptarë të futbollit. Kënaqësitë e jetës lidhen me emocione. Një ditë si këtë e ëndërruam me shekuj, e kujtuam gjatë, e pritëm me emocione drithëruese, me lot. Tanimë e kemi moton, “bëhu pjesë e udhëtimit më të madh që do t’i përfaqësojë dy ngjyrat më të bukura”. Ndryshe nuk do na e bëjë “hallall” "Marshin Beqiri" dhe të gjithë ata që e deshën, por nuk patën fatin të gëzohen në këto ditë të mrekullueshme, për Skuadrën e Zemrës “Shkëndija”, thuhet më tej në njoftim. /Telegrafi/