Bahtiri: Për Trepçën bisedohet vetëm në Mitrovicë dhe Prishtinë

Kryetari i komunës së Mitrovicës, Agim Bahtiri, ka reaguar ndaj deklaratës së Ministrit të  Administrimit të Pushtetit Lokal në Qeverinë e Kosovës, Ljubomir Mariq, i cili kishte thënë se për Trepçën duhet të bisedohet në Bruksel.

Bahtiri në një prononcim për Veriu.info ka thënë se për Trepçën mund të bisedohet vetëm në Mitrovicë dhe Prishtinë, por asnjëherë në Bruksel apo diku tjetër.

Ai i ka thënë Mariqit se Trepça është e krejt Kosovës, pa dallim nacionaliteti, sepse edhe serbët janë qytetarë të Kosovës.

“Ministri Mariq duhet ta dijë se është ministër i Qeverisë së Kosovës dhe duhet të punoj për të mirën e Kosovës. Të gjithë ata që kanë pretendime të tilla, duhet ta dinë se Kosova është shtet i pavarur dhe sovran, ku për pasuritë tona kujdesemi ne vet dhe për to nuk negociojmë”, ka thënë Bahtiri për Veriu.info, duke i kërkuar ministrit Mariq që të kthjellet dhe ta pranoj realitetin.

I pari i Mitrovicës me këtë rast i ka bërë thirrje kryeministrit Mustafa që t’i përshpejtoj veprimet që sa më shpejt Trepça të rikthehet në një ndërmarrje profitabile dhe të krenohemi me punën e asaj, ashtu siç jemi krenuar dikur.