ATK të vendosë afate për certifikimin e arkave për kompanitë e licencuara

Një debat i ashpër është zhvilluar mbrëmë në emisionin “Subvencion” të RTK-së në të cilin u debatua për procesin e fiskalizimit.

Ushtruesi i detyrës së menaxherit të divizionit të arkave fiskale në ATK, Rexhep Krasniqi, iu bëri edhe njëherë të njohur kompanive të pafiskalizuara se është obligim ligjor që ato të pajisjeve fiskale ndërkaq për kompanitë e naftës, ato janë të obliguara të pajisën me sisteme të veçanta fiskale.

Ndërkaq zëdhënësi i kompanive të arkave fiskale, Kestrin Kumnova, theksoi nevojën që ATK-ja të vendos afate për kompanitë e reja që janë licencuar në mënyrë që ato të certifikojnë pajisjet e tyre dhe të mos zgjatet edhe më tutje ky proces.

“Udhëzimi Administrativ është ndryshuar tash e një vit dhe këto kompani ende nuk po arrijnë të certifikojnë pajisjet duke bërë që ky proces të zgjatet edhe më tutje” ka thënë ai. Përfaqësuesi i një kompanie që është licencuar për arka fiskale, Avdi Avdiu, nuk ka dhënë shpjegime pse po zvarritet procesi i certifikimit të pajisjeve të kompanisë së tij.

Drejtuesi i emisionit, Bexhet Begu disa herë ka insistuar që të marrë përgjigje pse këto kompani nuk po arrijnë të certifikojnë pajisjet dhe të zhbllokohet procesi i fiskalizimit mirëpo përfaqësuesi i kompanisë aplikuese për certifikim nuk është përgjigjur.

As përfaqësuesi i Shoqatës së Naftëtarëve, Fadil Berjani nuk ka dhënë ndonjë afat se kur do të fillojë operimi i kompanive të reja, përveç se ka përsëritur se naftëtarët po presin hyrjen e kompanive të reja në treg për t’u pajisur me arka fiskale. /Telegrafi/