Artistët kundërshtojnë shkurtimet buxhetore për projekte kulturore

Komuniteti artistik nuk e ka ndërmend të rrijë duarkryq karshi shkurtimeve buxhetore për projekte kulturore.

Organizatorë të festivaleve e përfaqësues të skenës së pavarur të kulturës në vend kanë paralajmëruar reagim ndaj listës së publikuar nga Ministria e Kulturës, sipas së cilës del që në krahasim me vitin e kaluar gati 300 mijë euro më pak janë dhënë këtë vit për projekte kulturore. Ky vendim i kabinetit të ministrit të Kulturës, Kujtim Shala, është shoqëruar me debat të nxehtë nëpër rrjete sociale.

Organizatorë festivalesh kanë zgjedhur mënyra të ndryshme për të protestuar kundër listës së projekteve kulturore të mbështetur nga institucioni më i lartë kulturor në vend. Reagimet e organizatave joqeveritare të kulturës do të përmblidhen në një vend.

Forumi Kulturor- rrjeti që përfshin mbi 30 organizata kulturore- ka paralajmëruar se gjatë javës do t’i drejtohet me një shkresë ministrit të Kulturës, Kujtim Shala, nëpërmjet së cilës do të kërkojë përgjigje për arsyet e shkurtimeve buxhetore dhe transparencë sa i përket mënyrës së vlerësimit. Përderisa vitin e kaluar ishin ndarë 800 mijë euro dhe ishin përkrahur mbi 300 projekte, sivjet janë ndarë 523 mijë euro dhe janë mbështetur rreth 200 projekte kulturore.

Ish-përfituesve më të mëdhenj të viteve të kaluar, sipas listës së sivjetme, u është ndarë çereku i buxhetit. Por ka edhe të tillë që janë përjashtuar krejtësisht nga lista. Festivali Ndërkombëtar i Muzikës “Kosova Kamerfest” – festivali i parë i muzikës klasike në vend- që vitin e kaluar mbajti edicionin e 15-të, nuk ka përfituar as edhe një cent të vetëm nga buxheti i shtetit. Ngjashëm në listën e MKRS-së për përkrahje kulturore janë përjashtuar edhe Garat e Muzikantëve të Rinj “ARS Kosova”. Të dyja këto aktivitete kulturore kishin përfituar mjete nga Ministria e Kulturës në edicionet e kaluara.

Në shenjë pakënaqësie ndaj shkurtimeve buxhetore të Ministrisë së Kulturës, organizatorët e festivalit “PriFilmFest”, të dielën kanë bërë publik vendimin për anulimin e edicionit të shtatë. Përderisa vitin e kaluar Festivali Ndërkombëtar i Filmit “PriFilmFest” i printe listës me 22 mijë euro, për këtë vit ai do të marrë më pak se një të katërtën, 5 mijë euro.

Organizatorët e festivalit “Chopin Piano Fest Prishtina” veçse kanë lansuar kërkesën për ndihmë. Ky festival sivjet është përkrahur vetëm me 2 mijë euro.

Muziktarëve të Rinj “DAM Fest” të premten në koncertin paralajmërues të edicionit të 10-të, u shoqërua edhe me reagim ndaj Ministrisë së Kulturës.

“Mbështetja që sot Ministria e Kulturës i ka dhënë skenës së pavarur kulturore është treguesi më i mirë se kultura është çështje tejet serioze për t’u lënë në duart e politikanëve”, ka thënë drejtori i këtij festivali, Dardan Selimaj.

Por as ministri i Kulturës, Kujtim Shala, e as këshilltari i tij i lartë, Vehbi Miftari, të dielën nuk kanë qenë në dispozicion për t’u përgjigjur.

Kamuran Goranci, drejtor i Departamentit të Kulturës në MKRS, po ashtu nuk ka dashur të përgjigjet në pyetjet e gazetës. Florent Mehmeti, kryetar i Forumit Kulturor, ka thënë se ende nuk është vendosur konkretisht se cila do të jetë forma e reagimit, por ka siguruar që artistët do t’i drejtohen ministrit të Kulturës me një shkresë përmes së cilës do të kërkojnë shpjegime. /KohaDitore/