Arrestohet një shkencëtar i lartë rus i raketave hipersonike me akuzën e tradhtisë

Shkencëtari kryesor rus i fluturimeve hipersonike u arrestua nën dyshimin për tradhti të premten, sipas mediave shtetërore ruse.

Dr Alexander Shiplyuk, drejtor i Institutit të Mekanikës Teorike dhe të Aplikuar të Degës Siberiane të Akademisë së Shkencave Ruse, është shkencëtari i tretë rus këtë verë që arrestohet me dyshimin për tradhti, raporton cnn.

Drejtori shkencor i institutit Vasily Fomin tha për agjencinë ruse të lajmeve TASS se Shiplyuk u dërgua në qendrën e paraburgimit Lefortovo në Moskë, raporton cnn.

Ndalimi vjen pas arrestimit më 27 qershor të studiuesit kryesor të institutit, Anatoli Maslov, i cili dyshohet se ka transmetuar të dhëna sekrete shtetërore në lidhje me raketat hipersonike.

Sipas faqes së internetit të institutit, Shiplyuk drejton një laborator teknologjik me tunele unike të erës, të ndërtuara për simulimin e kushteve hipersonike.

Më 30 qershor, Gjykata e Qarkut Sovetsky e Novosibirsk arrestoi një shkencëtar tjetër, Dmitry Kolker, një studiues në Institutin e Fizikës Laserike të Degës Siberiane të Akademisë së Shkencave Ruse.

Kolker u arrestua me akuza për tradhti shtetërore për gjoja bashkëpunim me shërbimet e sigurisë së Kinës, raportoi reuters.

Kolker, i cili u diagnostikua me kancer në fazën e katërt, vdiq teksa po transferohej nga qendra e paraburgimit.

Fuqitë ushtarake në Rusi, Kinë dhe Shtetet e Bashkuara po punojnë për zhvillimin e armëve të automjeteve hipersonike (HGV).

Këto janë armë shumë të manovrueshme që teorikisht mund të fluturojnë me shpejtësi hipersonike ndërsa rregullojnë kursin dhe lartësinë për të fluturuar nën zbulimin e radarëve dhe rreth mbrojtjes raketore.

Ekspertët thonë se armë të tilla janë tepër të vështira për t’u mbrojtur.

Rusia mendohet të ketë një HGV në arsenalin e saj, sistemin Avangard, për të cilin presidenti rus Vladimir Putin në vitin 2018 pretendoi se ishte “praktikisht i paprekshëm” ndaj mbrojtjes ajrore perëndimore. /Telegrafi/