Arrestohen dy persona të dyshuar për mundësim prostitucioni

Drejtoria për Hetimin e Trafikimit me Qenie Njerëzore, Njësia në Prizren të martën ka arrestuar personat e dyshuar A. K i lindur më 1972 dhe H. U e lindur më 1965 me dyshimin se të njëjtit kanë kryer veprën penale mundësim në prostitucion.

Mësohet se arrestimi i personave të dyshuar është kryer pas hetimeve disa mujore që ka zhvilluar kjo njësi, hetime të autorizuara nga Prokurori Publik, për shkak se ekzistonte dyshimi i bazuar se të dy personat kanë mundësuar zhvillimin e Prostitucionit në qytetin e Prizrenit.

“Gjatë hetimeve kanë siguruar prova të mjaftueshme, që dy personat e lartcekur kanë ndërmjetësuar në gjetjen e klientëve disa femra për shërbime seksuale duke përfituar në mënyrë të paligjshme ( shuma të ndryshme parash) si dhe personi i arrestuar H. U ka shfrytëzuar shtëpinë e saj në Prizren që të kryhen shërbimet seksuale nga persona të ndryshëm për këtë veprimtari kundërligjore”, thuhet në kumtesë.

Gjithashtu janë intervistuar persona në cilësinë e dëshmitarëve, të cilët kanë dëshmuar se dy të dyshuarit kanë mundësuar zhvillimin e prostitucionit.

Të dy personat e dyshuar me autorizim të Prokurorit të Qarkut në Prizren iu është shqiptuar masa e ndalimit policor dhe janë dërguar në qendrën e ndalimit për 48 orë.

Hetimet lidhur me rastin janë duke vazhduar për identifikimin dhe arrestimin e personave të tjerë të mundshëm të përfshirë në këtë rast. /Telegrafi/