Android më i lëndueshëm se iPhone

Shumë ekspertë të sigurisë për këtë vit paralajmërojnë rritje të sulmeve të hakerëve, aplikacioneve dashakeqe dhe sulmeve të ngjashme të drejtuara kah pajisjet mobile, e shumë prej tyre si shënjestër kryesore të sulmuesve i theksojnë pikërisht pajisjet të cilat vihen në funksion nga sistemi operativ mobil Android.

Njeriu i parë i kompanisë për siguri Trend Micro Steve Chang ka dhënë një intervistë për Businessweek, në të cilën ka theksuar se Google Android për shkak të “hapësisë” së tij është dukshëm më i lëndueshëm nga sulmet e hakerëve dhe viruseve sesa Apple iOS.

“Na duhet t’ia pranojmë kompanisë Apple për kujdesin e saj; shumica e viruseve pothuajse e kanë të pamundur të veprojnë në iPhone”, ka shtuar Chang.

Google, krijuese e sistemit operativ Android, u mundëson programuesve në mbarë botën qasje në kodin burimor të sistemit të saj, e qasja i është mundësuar edhe dashakeqëve të cilët mund ta shfrytëzojnë atë për punë të pista dhe shpërndarje të përmbajtjeve qëllimkëqija.

Megjithatë, Chang ka theksuar se as Apple iPhone nuk është tërësisht imun ndaj sulmeve të hakerëve, mirëpo ato janë shumë më vështirë të kryhen sesa në Android.

Për më tepër, analizat e kompanisë Trend Micro dëshmojnë se sulmet në iOS mund të kryhen vetëm me të ashtuquajturat dredhi të rrjetëzimit social, me ç’rast përdoruesit udhëzohen kah hapësira të caktuara të internetit me anë të cilave kryhen sulmet në iPhone. /Telegrafi/