Aksion policor në Fushë Topanë të Shkupit, arrestohen dy persona

Ministria për Punë të Brendshme informon se gjatë ditës së djeshme Departamenti për kriminalistikë pranë SPB Shkup, ka realizuar aksion për konfiskimin e armëve dhe municionit në Fushë Topanë.

Nga MPB thonë se në këtë aksion janë arrestuar dy persona nga Shkupi, A.J (46) dhe S.J (73), për shkak të dyshimit për kryerjen e veprës penale “përpunim të paligjshëm, mbajtje dhe tregti me armë ose materie shpërthyese”, përcjell Telegrafi Maqedoni.

“Pas urdhrit të siguruar nga gjykatësi i procedurës paraprake nga Gjykata Penale-Shkup, është kryer bastisje në shtëpinë dhe hapësirat ndihmëse të A.J. ku janë gjetur dhe konfiskuar 6 pushkë gjahu, 3.215 plumba dhe shumë pjesë të ndryshme për armë si dhe një matëse digjitale për matjen e barutit. Gjithashtu sipas zëdhënëses së policisë Suzana Pranjiq, bastisje është kryer edhe në shtëpinë e babait të A.J. në Rashtak, ku është gjetur një pushkë gjysmë-automatike, një pushkë gjahu dhe shumë pjesë të tjera të armëve”, thuhet në njoftimin e MPB-së.

Nga MPB shtojnë se personat në fjalë janë dërguar në stacionin e policisë dhe pas dokumentimit të rastit ndaj tyre do të ngriten padi adekuate./Telegrafi/