Abrashi: Qindra persona janë punësuar dhe mbi 500 janë trajnuar nga grupi me nevojë

Është hapur takimi “Busines to Busines”, që ka për qëllim inicimin e bashkëpunimit afarist në mes të ndërmarrjeve sociale të krijuara si rezultat i grant-skemës “Rritja e punësimit të grupeve në nevojë dhe bizneseve”, anëtare të Odës Ekonomike të Kosovës.

Ministri i Punës dhe Mirëqenies Sociale, Arban Abrashi, i cili mori pjesë në këtë takim, tha se me këtë projekt janë punësuar qindra vetë dhe janë trajnuar mbi 500, ku përfshihet kategoria me nevoja të veçanta.

Abrashi bëri me dije se Ministria e Punës është në fazën finale për miratimin e Ligjit për Ndërmarrjet Sociale brenda dhjetë ditëve, që sipas tij, me këtë do të përmbyllet korniza ligjore sa i përket këtyre ndërmarrjeve, sepse sipas Abrashit shumë prej përfituesve me projekte të ndryshme mund të krijojnë ndërmarrje sociale me fokus të veçantë tek personat me nevojë.

“Ky është një projekt i cili është përkrah nga BE, ku përfitues direkt ka qenë Ministria e Punës dhe Mirëqenies sociale me fokus të veçantë të përkrahës së grupeve me nevojë, kategorive më të marxhionalizuara në Kosovë dhe ka pasur sukses të mirë, sepse janë punësuar disa qindra persona, janë trajnuar mbi 500. Janë krijuar shumë mundësi biznesi për këto kategori e posaçërisht me faktin sepse ky projekt ka sjellë përvojat më të mira të bashkimit Evropian në Kosovë, të cilat paraqesin ekonomi sociale të tregut. Një ekonomi e cila funksionon sipas rregullave të tregut të lirë, por e ka një vëmendje tek kategoritë e veçanta”, tha Abrashi.

Përfaqësuesi i BE në Prishtinë, Libor Chlad tha se projekti i BE-së ka për qëllim punësimin e pjesëtarëve të grupeve të cenueshme. Ai pret ndikimet e para për mirëqenien në Kosovë me këto projekte që kapin shumën rreth 3 milionë euro.

“Me këtë projekt Bashkimi Evropian i ka kontribuar punësimit të shumë pjesëtarëve të grupeve të ndryshme të cenueshme. Ne kemi ofruar trajnime dhe mundësi të punësimit të njerëzve me aftësi të kufizuara, grave, grupeve të pakicave dhe të tjerëve. Kjo është një mundësi mjaft e madhe dhe e rëndësishme. Ne të gjithë synojmë krijimin e një tregu të punësimit që do të përfshinte sa më shumë qytetarë të Kosovës, duke I përfshirë edhe ata të cilët e kanë të vështirë të gjejnë punësim”, theksoi Chlad.

Edhe kryetari i Odës Ekonomike të Kosovës Safet Gërxhaliu vlerësoi lart punësimin dhe angazhimin e qytetarëve me nevojë. Ky projekt sipas tij është një avancim për qytetarët e kategorisë sociale.

“Një takim i tillë ka rëndësi multi-dimensionale në rendë parë nga dimensioni kohorë që po ndodhë në fund të vitit, në rendë të dytë është një takim i rëndësisë sociale, sepse është koha kur duhet të dëshmohet që kjo pjesë e shoqërisë nuk dëshiron të jetë barrë, por dëshiron të jetë pjesë e proceseve pozitive të shoqërisë kosovare. Dhe besoi se një kontribut të tillë duhet të respektohet dhe këtë që e bënë Ministria e Punës dhe Bashkimi Evropian është në funksion të mbështetjes të një grupi me rëndësi të veçantë”, theksoi Gërxhaliu.

Ideja kreative dhe inovative të vet punësimit për gra, të rijnë, dhe grupe të tjera në nevojë jetësohen përmes financimit nga Bashkimi Evropian.