Abdixhiku: Partitë në pushtet, vështirë ta përpijnë demarkacionin, sepse gjuajtën gaz dhe krijuan trazira (Video)

Deputeti i Lidhjes Demokratike të Kosovës (LDK), Lumir Abdixhiku, ka theksuar se për interesa të disa individëve, që po kërkojnë me ngulm shfuqizimin e Gjykatës Speciale, është vënë në rrezik raporti me Shtetet e Bashkuara të Amerikës (SHBA) dhe partnerët tjerë, të cilët këtë ndërmarrje e kanë cilësuar si thikë pas shpine.

Ai në një intervistë për Telegrafin, me gazetarin Muhamet Hajrullahu, ka thënë se Kosova e ka pasur në obligimin e saj ndërkombëtar, themelimin e kësaj gjykate, duke shtuar se zhbërja e saj do të mund të na kthente në fuqi rezolutën 1244, duke krijuar argumente shtesë për kundërshtarët e shtetit të Kosovës.

“Pozicioni jonë si LDK, është i qartë. E kemi thënë se Gjykata Speciale është e padrejtë, por tash e kemi një obligim. Një situatë e tillë kërkon maturi prej institucioneve të Kosovës. Ne nëse duam mbështetje nga ndërkombëtarët, duhet ta dimë këtë punë si të harruar dhe se zhbërja e saj është e pamundshme”, ka shtuar Abdixhiku.

Sipas tij, çështja e liberalizimit të vizave, është në një ngërç, duke shtuar se përderisa kjo Qeveri është në pushtet, qytetarët do të mbesin të izoluar.

“Një qeveri që nuk artikulon idetë e veta edhe në parlament, nuk don të bëjë zgjidhje, por tenton të blejë kohë. Po punojmë vazhdimisht, por asnjë ndryshim nuk është deri më tani. Ne kemi dhënë qëndrimin tonë. Në momentin e parë që i ka votat për demarkacion kjo Qeveri, ne do ta votojmë. Nuk ka zgjidhje për të votuar demarkacionin aktual, sepse partitë e kësaj Qeverie kanë hedhur gaz dhe kanë krijuar trazira për këtë kauzë. Më parë mbajnë gjendjen në status – qou, se sa ta përpinë këtë fakt”, ka shtuar Abdixhiku.

Ai ka vlerësuar se kjo Qeveri ka edhe njerëz të paditur, sepse sipas tij, edhe nëse ratifikohet demarkacioni, do të kemi një proces gati njëvjeçar derisa merret vendimi për liberalizim të vizave. /Telegrafi/