Akuza qeveri-bashki për korrupsion

Kryeministri Sali Berisha hodhi të hënën akuza në drejtim të Bashkisë së Tiranës, duke e akuzuar për korrupsion me lejet e ndërtimit. Gjatë mbledhjes së grupit parlamentar, Berisha tha se kryebashkiaku Rama përfaqëson monumentin më të nxirë të korrupsionit në Shqipëri dhe në botë.

“Hidhni sytë te kulla e Fidelit. Ajo nuk është gjë nga ç’është shtatorja e korrupsionit të kryetarit të tij. Problemi i zotit Rama është se ky është i vetmi korrupsion në botë që mbrohet nga korruptorët e shtetit. Në mënyrë të padiskutueshme, ky është i vetmi korruptor i njohur botërisht që mbrohet nga korruptorët e shtetit. 70 për qind të lejeve të ndërtimit kryebajlozi i korrupsioni ua ka dhënë vetëm dy kompanive, drejtorit të tij të urbanistikës dhe Shkrelit të vetë të bashkisë. Për 70 për qind të lejeve të ndërtimit institucionet zyrtare kanë çuar dosje në Prokurori me kohë, por korruptorët e shtetit kanë vendosur të mos njohin as ligj dhe as Maliq për mbrojtjen e tij”, theksoi Berisha.

Ai shtoi se Rama është zyrtari i vetëm që është akuzuar publikisht nga biznesmenë dhe ndërtues se ka kërkuar 1 milionë euro ose 600 milionë euro, për leje ndërtimi.

Pas këtyre deklaratave, reagoi edhe Bashkia e Tiranës, duke nënvizuar se e gjithë Shqipëria e ka parë korrupsionin me bllok të qeveritarëve.

“Sali Berisha duhet të jetë i vetmi në botë që shan pasi të vret. Në lumin e zi të sharjeve të tij, nuk mungojnë të sharat për Bashkinë e Tiranës, ku ai ka humbur e do vazhdojë të humbasë sa herë të garojë, sepse është i papajtueshëm me kryeqytetin dhe qytetarët e tij. Sa për korrupsionin, jo vetëm Tirana por edhe e gjithë Shqipëria e kanë parë tashmë bllokun e ndyrë të koalicionit të turpit. Sali Berisha ka dështuar dhe për të mbuluar dështimin, ka vrarë, ai duhet vetëm të largohet”, tha zëdhënësi i Bashkisë, Florian Serjani. /Telegrafi/